యూఎస్‌లో సరికొత్త రికార్డు సృష్టించిన "సరాల్ : సీజ్‌ఫైర్"

ప్రభాస్ హీరోగా ప్రశాంత్ నీల్ దర్శకత్వంలో తెరకెక్కుతున్న చిత్రం "సలార్ : సీజ్‌ఫైర్". త్వరలోనే ఈ చిత్రం ప్రేక్షకుల ముందుకురానుంది. అయితే, తాజాగా ఈ మూవీ సరికొత్త రికార్డును నెలకొల్పింది. యూఎస్‌లో ఏకంగా 1979కిపైగా చిత్రాల్లో విడుదలకానుంది. 

అమెరికాలో ఇన్ని లొకేషన్లలో రిలీజ్‌కానున్న తొలి భారతీయ చిత్రంగా 'సలార్‌' నిలువనుంది. ఈ మేరకు విడుదలైన పోస్టర్‌ సైతం ప్రేక్షకుల్లో ఆసక్తి రేకెత్తిస్తోంది. 1979ని రెడ్‌ కలర్‌తో పెద్ద సైజులో డిజైన్‌ చేయడంతో అందరి దృష్టి దానిపైనే ఉంది. ఆ సంఖ్యను సంవత్సరంలా భావించిన పలువురు సినీ ప్రియులు కథలో అది కీలకంగా ఉండే అవకాశాలున్నాయని అభిప్రాయపడుతున్నారు. 

'కేజీయఫ్‌'లో హీరో యశ్‌ బ్రాండ్ గురించి డైలాగ్‌ చెబుతూ.. 'సిన్స్‌ 1951' అని చెప్పిన సంగతి తెలిసిందే. దాంతో, 'కేజీయఫ్‌', 'సలార్‌'కి ఏదో లింక్‌ ఉందంటూ కామెంట్లు పెడుతున్నారు. మరోవైపు, 1979 ప్రభాస్‌ పుట్టిన సంవత్సరమంటూ కొందరు అభిమానులు సందడి చేస్తున్నారు. దీనికి సమాధానం తెలియాలంటే సినిమా విడుదల వరకు వేచి చూడాల్సిందే. అమెరికాలో 27న ప్రీమియర్‌కానున్న ఈ సినిమా ఇండియాలో సెప్టెంబరు 28న పలు భాషల్లో విడుదలకానుంది. ఐమాక్స్‌ ఫార్మాట్‌లోనూ అందుబాటులో ఉండనుంది. 

ఇటీవల విడుదలైన టీజర్‌ విశేషంగా సినిమాపై మరిన్ని అంచనాలు పెంచింది. హీరోని ఎలివేట్‌ చేస్తూ ప్రముఖ నటుడు టీనూ ఆనంద్‌ చెప్పిన 'సింపుల్‌ ఇంగ్లీష్‌' డైలాగ్స్‌, యాక్షన్‌ విజువల్స్‌ ప్రేక్షకులతో అదరహో అనిపించాయి. పవర్‌ఫుల్‌ యాక్షన్‌ ఎంటర్‌టైనర్‌గా రూపొందుతున్న ఈ సినిమాలో ప్రభాస్‌ సరసన శ్రుతి హాసన్‌ నటిస్తున్నారు. జగపతిబాబు, ఈశ్వరీరావు, శ్రియారెడ్డి తదితరులు కీలక పాత్రలు పోషించారు.