గత కొంతకాలంగా సరైన హిట్టు లేకుండా వరుస పరాజయాలతో కొట్టుమిట్టాడుతున్న చియాన్ విక్రమ్ ఇపుడు తన పంథాను మార్చాడు. 'చీకటి రాజ్యం' చిత్రం దర్శకుడు రాజేష్ ఎం. సెల్వ డైరెక్షన్‌లో తెరకెక్కిన చిత్రం 'కదరం కొండన్'. ఈ చిత్రం ఫస్ట్ లుక్‌కు మంచి స్పందన వచ్చింది.
తాజాగా సంక్రాంతి పండుగను పురస్కరించుకొని చిత్ర యూనిట్ ఈ సినిమా టీజర్‌ను విడుదల చేసింది. ఇక ఈ టీజర్‌లో విక్రమ్ న్యూ లుక్‌లో చాలా స్టైలిష్‌గా ఉండటంతో అభిమానులను తెగ ఆకట్టుకుంటోంది. ఇక ఈ చిత్రాన్ని యూనివర్సల్‌ హీరో కమల్ హాసన్.. తన సొంత నిర్మాణ సంస్థ రాజ్ కమల్ ఇంటర్నేషనల్ పతాకంపై నిర్మిస్తున్నారు.
ఈ చిత్రంలో కమల్ హాసన్ చిన్న కూతురు అక్షరా హాసన్ కూడా నటించారు. ఇక వరుస ఫ్లాపుల్లో ఉన్న కమల్ హాసన్, విక్రమ్‌లు కలిసి చేస్తున్న ఈ సినిమాతో వీళ్లిద్దరు సక్సెస్ అందుకుంటారా అనేది వేచి చూడాలి. ఇక ఇప్పటికే శంకర్‌ దర్శకత్వంలో కమల్ హాసన్ నటిస్తున్న 'భారతీయుడు-2' ఫస్ట్ లుక్‌ను కూడా సంక్రాంతి సందర్భంగా చిత్ర బృందం విడుదల చేసిన విషయం తెలిసిందే.