ప్రముఖ హాలీవుడ్ నటి, సామాజిక కార్యకర్త ఆష్లే జడ్ సంచలన వ్యాఖ్యలు చేశారు. ఆష్లే అమెరికాలోని ప్రముఖ మ్యూజిక్‌ స్టార్‌ నయోమి జడ్ కుమార్తె. గతంలో కూడా ఆష్లే తనను హాలీవుడ్ స్టూడియో ఎగ్జిక్యూటివ్ ఒకరు లై
ప్రముఖ హాలీవుడ్ నటి, సామాజిక కార్యకర్త ఆష్లే జడ్ సంచలన వ్యాఖ్యలు చేశారు. ఆష్లే అమెరికాలోని ప్రముఖ మ్యూజిక్‌ స్టార్‌ నయోమి జడ్ కుమార్తె. గతంలో కూడా ఆష్లే తనను హాలీవుడ్ స్టూడియో ఎగ్జిక్యూటివ్ ఒకరు లైంగికంగా వేధించారని వెల్లడించారు. అమెరికా అధ్యక్షుడు డొనాల్డ్‌ ట్రంప్‌ పాలసీలను వ్యతిరేకించిన హాలీవుడ్ సెలబ్రిటీలలో ఆష్లే కూడా ఒకరు.
ఈ నేపథ్యంలో తానూ చిన్నతనంలోనే లైంగిక వేధింపులు ఎదుర్కొన్నానని.. పద్నాలుగేళ్లకే అత్యాచారానికి గురయ్యానని ఆష్లే జడ్ బహిర్గతం చేశారు. బాలికలు, మహిళలపై లైంగిక హింసకు వ్యతిరేకంగా ఢిల్లీలో జరిగిన ప్రపంచ స్థాయి సమావేశాల్లో ఆష్లే మాట్లాడుతూ.. లింగవివక్ష గురించి, మహిళలపై అకృత్యాల గురించి ప్రసంగించిన ఆష్లే తానూ ఆ హింసకు బాధితురాలినేనని చెప్పారు. 1998లోనే తనపై అత్యాచారం జరిగిందని.. తాను ఏడేళ్ల వయస్సులో లైంగిక వేధింపులకు గురయ్యానని తెలిపారు.
కానీ తాను అక్రమ రవాణా బారిన పడకపోవడం మాత్రం అద్భుతమంటూ ఆష్లే (48) అక్రమ రవాణా బాధితుల పట్ల ఆవేదన వ్యక్తం చేశారు. మహిళలపై లైంగిక దోపిడి, హింస, లింగ వివక్షకు వ్యతిరేకంగా పోరాడాలన్నారు. హాలీవుడ్‌లోనూ లింగ వివక్ష చూపుతున్నారని, నటీనటులకు ఇచ్చే పారితోషికంలో చాలా తేడా ఉంటోందన్నారు. పురుషులతో పోలిస్తే సంపాదించాల్సిన దాని కంటే 40శాతం తక్కువ సంపాదిస్తున్నానని ఆష్లే చెప్పారు.