బాహుబలి భల్లాలదేవ రానాతో రొమాన్స్ పండించేందుకు కేథరిన్ రెడీ అవుతోంది. మెగాస్టార్ 150వ సినిమా ఐటెం సాంగ్ వివాదం నుంచి కోలుకున్న కేథరిన్.. రానాతో నటించేందుకు రెడీ అవుతోంది. తమిళం, తెలుగు, కన్నడ, మలయాళ సినిమాల్లో నటిస్తూ తన హవాను కొనసాగిస్తున్న కేథరిన్.. రానా హీరోగా నటిస్తున్న ద్విభాషా చిత్రం నానే రాజా నానే మంత్రి సినిమాలో కనిపించనుంది.
టాలీవుడ్ దర్శకుడు తేజ దర్శకత్వం వహిస్తున్న ఈ చిత్రంలో రానాతో ఇప్పటికే నటి కాజల్‌ అగర్వాల్ డ్యూయెట్లు పాడుతోంది. ఇప్పటికే ఈ సినిమా షూటింగ్ శరవేగంగా జరుగుతోంది. ఇటీవల ఈ సినిమాలోనే మరో టాప్ హీరోయిన్ శ్రుతిహాసన్ కూడా నటిస్తున్నట్లు ప్రచారం జరిగింది. అయితే శ్రుతిహాసన్‌కు డేట్స్ కుదరకపోవడంతో ఆమె స్థానంలో కేథరిన్‌ను తీసుకున్నట్లు యూనిట్ వర్గాల సమాచారం.
కేథరిన్‌కు పోటీగా ఈ రోల్ ఉంటుందని, రాజకీయ నేపథ్యంలో సాగే ఈ చిత్రం షూటింగ్ తొలి షెడ్యూల్ కారైక్కుడి, కేరళ ప్రాంతాల్లో జరుపుకుంది. త్వరలో హైదరాబాద్‌లో జరగనున్న షూటింగ్‌లో కేథరిన్ పాల్గొంటుందని తెలిసింది. కేథరిన్ ఇటీవల విడుదలైన అల్లు అర్జున్ సరైనోడులో మెరిసిన సంగతి తెలిసిందే.