అనారోగ్యంతో బాధపడుతున్నా.. అలసిపోయాను.. : మలైకా అరోరా తండ్రి చివరి వ్యాఖ్యలు

తాను అనారోగ్యంతో బాధపడుతున్నానని, తీవ్రంగా అలసిపోయానని బాలీవుడ్ నటి మలైకా అరోరా తండ్రి అనిల్ అరోరా తమ కుమార్తెలను చెప్పినట్టు సమాచారం. ఆయన బుధవారం ముంబైలో తన ఇంటి టెర్రస్‌పై నుంచి దూకి ఆత్మహత్య చేసుకున్న విషయం తెల్సిందే. ఈ ఘటన బాలీవుడ్‌ను దిగ్భ్రాంతికి గురిచేసింది. 65 యేళ్ల అనిల్ అరోరా మరణవార్తతో మలైకా కుటుంబంలో విషాదఛాయలు అలుముకున్నాయి. 

ఈ క్రమంలోనే అనిల్ అరోరా ఆత్మహత్య చేసుకునేముందు తన కుమార్తెలకు ఫోన్ చేసి మాట్లాడినట్లు తాజాగా వార్తలు వస్తున్నాయి. తన ఇద్దరు కుమార్తెలు మలైకా, అమృతకు ఫోన్ చేసి 'నేను అనారోగ్యంతో బాధపడుతున్నాను.. అలసిపోయాను' అని చెప్పినట్లు తెలుస్తోంది. తన తండ్రి మరణం తర్వాత ఆయన్ని తలచుకుంటూ బాధతో మలైకా ఇన్‌స్టాలో ఓ పోస్ట్ పెట్టారు. 

'మా తండ్రి మరణం మమ్మల్ని ఎంతో బాధిస్తోంది. ఆయన చాలా సున్నితమైన భావాలు కలిగిన వ్యక్తి. కుటుంబం పట్ల ఎంతో ప్రేమ చూపేవారు. తాత, భర్త, తండ్రిగా ఎంతో అంకితభావంతో, ప్రేమతో ఉండేవారు. ఆయన ఇకలేరని తెలిసి దిగ్భ్రాంతికి గురయ్యాం. ఇది తీరని నష్టం. ఈ కష్టసమయంలో మా గోప్యతను భంగం కలిగించొద్దని మీడియాను అభ్యర్ధిస్తున్నా. మాకు మద్దతుగా నిలుస్తారని ఆశిస్తున్నా' అని ఇన్‌స్టాలో పోస్ట్ పెట్టారు.

అనిల్ అరోరా మరణించిన సమయంలో మలైకా పుణెలో ఉన్నారు. విషయం తెలియగానే ముంబై చేరుకున్నారు. నటి మాజీ భర్త, నటుడు అర్బాజ్ ఖాన్, నటుడు సల్మాన్ ఖాన్ కుటుంబం ఈ విషయం తెలిసి మలైకాను పరామర్శించారు. 'ఘటన జరిగిన చోట ఎలాంటి సూసైడ్ లేఖ లభించలేదు. పంచనామా పూర్తయ్యాకే మరణానికి సంబంధించిన స్పష్టమైన కారణం తెలుస్తుందని పోలీసు వర్గాలు చెప్పాయి.