ఐకాన్ స్టార్ అల్లు అర్జున్ తాజా చిత్రం "పుష్ప". పాన్ ఇండియా మూవీగా విడుదై సంచలన విజయాన్ని నమోదు చేసుకుని అన్ని భాషల్లోనూ కాసుల వర్షం కురిపించింది. ఈ విజయాన్ని ఎంజాయ్ చేస్తున్న అల్లు అర్జున్.. తన సెలవుల కోసం యూరప్ వెళుతున్నట్టు వార్తలు వచ్చాయి. కానీ ఆయన హైదరాబాద్ దిగి ప్రతి ఒక్కరికీ ట్విస్ట్ ఇచ్చారు. దుబాయ్‌లో 16 రోజుల వెకేషన్‌ను ఎంజాయ్ చేసిన బన్నీ తాజాగా ఇంటికి చేరుకున్నారు. అక్కడ పుష్పరాజ్‌కు కుమార్తె అల్లు అర్హ పూలతో ఘన స్వాగతం పలికారు. వెల్ కమ్ నానా అంటూ ఫ్లోర్‌పై స్వాగత నోట్ రాసి సర్‌ప్రైజ్ చేసింది.
ఆ తర్వాత ఆయన తన కార్యాలయానికి రాగా అక్కడ కూడా కార్యాలయ సిబ్బంది మంచి సర్‌ప్రైజ్ ఇచ్చారు. బన్నీ ఆఫీస్ మొత్తాన్ని గంధపు దుంగలు, కేకులతో తగ్గేదేలే అని రాసి చుట్టూ పుష్ప వాతావరణాన్ని సృష్టించారు. అటు కుటుంబ సభ్యులు, ఇటు టీమ్ తనపై కురిపించిన ప్రేమకు అల్లు అర్జున్ ఉప్పొంగిపోయాడు. ఈ విషయాన్ని అల్లు అర్జున్ తన ట్విట్టర్ ఖాతాలో పంచుకున్నారు. కాగా, అల్లు అర్జున్ ఇపుడు పుష్ప-2 చేస్తున్న విషయం తెల్సిందే. కొత్త ప్రాజెక్టులపై ఇంకా కమిట్ కాలేదు.