అఖండ జ్యోతిలా వెల‌గాలి- బాల‌కృష్ణ‌గారిలో ఆ రెండే నాకు న‌చ్చేవిః అల్లు అర్జున్‌

Allu arjun- Bala krishna

బాల‌కృష్ణ‌గారు న‌టించిన అఖండ సినిమా అఖండ జ్యోతిలా వెలుగుతూనే వుండాలి. డిసెంబ‌ర్ 2న విడుద‌ల‌వుతుంది. రెండు వారాల్లో పుష్ప విడుద‌ల‌వుతుంది. మ‌రో రెండు వారాల్లో మ‌రో సినిమా ఇలా అన్ని సినిమాలు చిన్నా పెద్ద తేడాలేకుండా అన్నీ స‌క్సెస్ కావాల‌ని- అల్లు అర్జున్ ఆకాంక్షించారు.

శ‌నివారం రాత్రి శిల్పకళా వేదికలో జరిగిన అఖండ ప్రీరిలీజ్ వేడుక‌కు ఆయ‌న‌ హాజ‌ర‌య్యారు. ఈ సంద‌ర్భంగా అల్లు అర్జున్ మాట్లాడుతూ, నంద‌మూరి రామారావు కుటుంబం మా తాత గారి నుంచి మంచి అనుబంధం వుండేది. మా ఇరు కుటుంబాల‌వారు ఒకే కుటుంబంలా వుండేవాళ్ళం. బాల‌కృష్ణ‌గారిని 12 ఏళ్ళ‌నాడు ఓ ఫంక్ష‌న్‌లో చూశా. ఆ రాత్రంతా నాకు ఆయ‌నే గుర్తుకు వ‌చ్చారు. చుట్టూ ఎంతో మంది వున్నా ఏమి ప‌ట్టించుకోకుండా ఎంత ఆనందంగా వుండ‌గ‌ల‌గుతున్నారో. అది అంద‌రికీ సాధ్యం కాదు. ఆయ‌న‌లో ఇంత ఎనర్జీ ఎలా వుంటుంది అని ఆలోచించాను. ఆయ‌న చేసిన క‌ష్టం, కృషి ఇందుకు కార‌ణ‌మ‌ని అనుకున్నాం. 

నాకు బాల‌కృష్ణ‌గారిలో న‌చ్చేవి రెండే రెండు. అడిక్ష‌న్‌, డిక్ష‌న్‌. మాట విరుపులు, పేజీల‌కొద్దీ డైలాగ్‌లు మాట్లాడ‌డం. ఒక్క ఎన్‌.టి.ఆర్ .త‌ర్వాత మ‌ర‌లా బాల‌కృష్ణ‌గారికే చెల్లుతుంది. ఆయ‌న‌లా ఎవ్వ‌రూ అలా డైలాగ్‌లు చెప్ప‌లేరు. డిసెంబ‌ర్‌2న ఆయ‌న సినిమా విడుద‌ల‌వుతుంది. రెండు వారాల‌కు పుష్ప‌, ఆ త‌ర్వాత మ‌రో సినిమా ఇలా అన్నీ విజ‌యంసాధించాలి.

ప్ర‌పంచంలో క‌రోనా వ‌చ్చినా, ఏది వ‌చ్చినా తెలుగు ప్రేక్ష‌కులు లెక్క‌చేయ‌రు. థియేట‌ర్ల‌లో ఫుల్‌గా వ‌చ్చి ఆద‌రిస్తార‌ని మెచ్చుకున్నారు.