అమీర్ ఖాన్ ఇంటికి వచ్చిన కరోనా.. సిబ్బందిలో కొందరికి కోవిడ్..

Amir khan

బాలీవుడ్ హీరో, మిస్టర్ పర్ఫెక్షనిస్ట్ అమీర్ ఖాన్ ఇంట్లో కరోనా కలకలం రేపింది. మొన్నామధ్య బోనీ కపూర్ ఇంట్లో కూడా చాలా మందికి వైరస్ సోకిన సంగతి తెలిసిందే. ప్రస్తుతం అమీర్ ఖాన్ ఇంటికి కూడా కరోనా వచ్చింది. ఈ విషయాన్ని అమీర్ ఖాన్ సోషల్ మీడియా ద్వారా పంచుకున్నాడు.

తన సిబ్బందిలో కొందరికి కరోనా వైరస్ సోకినట్లు నిర్ధారించారని తెలియజేశాడు. సిబ్బందికి రావడంతో అమీర్ కుటుంబ సభ్యులతో పాటు వాళ్ల అమ్మకు కూడా కరోనా పరీక్షలు నిర్వహించనున్నారు. ఇందులో తన కుటుంబ సభ్యులతో పాటు తల్లికి నెగటివ్ రావాలని కోరుకుంటున్నట్లు తెలిపాడు. 

ఈ విషయంపై వెంటనే స్పందించిన ముంబై మున్సిపల్ కార్పోరేషన్ అధికారులకు అమీర్ ధన్యవాదాలు తెలియజేశారు. ఇక వైరస్ సోకిన వాళ్లను క్వారంటైన్‌కు పంపినట్లు అమీర్ తెలిపాడు. వాళ్లకేం సాయం కావాలన్నా కూడా చేయడానికి తాను సిద్ధంగా ఉన్నట్లు వెల్లడించాడు. దేశంలో కరోనా ప్రమాద స్థాయి రోజురోజుకీ పెరిగిపోతుంది. ముంబైలో ఇప్పటికే లక్ష కేసులు దాటిపోయాయి. దాంతో అంతా అప్రమత్తంగా ఉండాలని అమీర్ ఖాన్ సూచించాడు.

ప్రస్తుతం అమీర్ ఖాన్ లాల్ సింగ్ చద్దా చిత్రంలో నటిస్తున్నారు. 1994లో వచ్చిన ఫారెస్ట్ గంప్ అనే హాలీవుడ్ సినిమాకు ఇది రీమేక్. ఇందులో క్లైమాక్స్‌లో కూడా కరోనా వైరస్ గురించి చెప్పబోతున్నాడు. దీనికి అద్వైత్ చందన్ దర్శకుడు.