బుధవారం రాత్రి హైదరాబాద్‌లో జరిగిన సీతారామం చిత్రం గ్రాండ్ ప్రీ రిలీజ్ ఈవెంట్‌కు పాన్ ఇండియా స్టార్ ప్రభాస్ హాజరయ్యారు. చాలాకాలం తర్వాత తమ అభిమాన నటుడిని పబ్లిక్ ఈవెంట్‌లో చూస్తున్నందుకు అభిమానుల ఆనందానికి హద్దులు లేకుండా పోయాయి. ప్రభాస్ చాలా సాదాసీదాగా కనిపించారు.
సాధారణ దుస్తులను ధరించాడు. సీతారామం ప్రి-రిలీజ్ ఈవెంట్‌లో ప్రభాస్ లుక్ చూసి అభిమానులు ఆశ్చర్యానికి లోనయ్యారు. ప్రభాస్ ధరించిన టీ-షర్ట్ ధర గురించి చర్చించుకున్నారు. ఆ టీ-షర్ట్ సుమారు రూ. 20,000 వుంటుందనీ, అచ్చం ఇలాంటి టీషర్ట్ 2017లో వేసుకున్నాడనీ అంటున్నారు. ఐతే... ఇప్పుడు వేసుకున్నది పాత టీషర్టా లేదంటే కొత్తదా అంటూ చర్చించుకుంటున్నారు.
కాగా ఈ చిత్రం గురించి ప్రభాస్ మాట్లాడుతూ... ''సీతారామం లాంటి సినిమా తియ్యాలి అంటే మామూలు విషయం కాదు. స్వ‌ప్నదత్ అద్భుతంగా డిజైన్ చేసి క‌శ్మీర్‌లో చ‌లిలోనూ, క‌రోనా టైంలో డేర్‌గా సినిమాను తీసింది. ఆమె కోస‌మే నేను వ‌చ్చాను. కొన్ని సినిమాలు థియేటర్ లోనే చూడాలి సీతా రామం సినిమాని థియేటర్ లోనే చూడాలి. ఇంట్లో దేవుడు వున్నాడు అని గుడికి వెళ్ళడం మనేస్తామా... ఇది అంతే. మాకు థియేటర్స్ గుడులు లాంటివి. తప్పకుండా సినిమాని థియేటర్లో చూడండి అని ప్రభాస్ అన్నారు. చ‌క్క‌టి సంగీత‌భ‌రిత చిత్రంగా సీతారామం రూపొందింది. అన్ని ఎమోష‌న్స్ ఇందులో వున్నాయ‌ని అశ్వ‌నీద‌త్ తెలిపారు.
సీతా రామంలో దుల్కర్ సల్మాన్, మృణాల్ ఠాకూర్ జంటగా నటిస్తున్నారు. ఈ రొమాంటిక్ పీరియాడికల్ డ్రామాలో రష్మిక మందన్న కీలక పాత్ర పోషించింది. ఇందులో తరుణ్ భాస్కర్, సుమంత్, ప్రకాష్ రాజ్, గౌతమ్ వాసుదేవ్ మీనన్ తదితరులు నటించారు. హను రాఘవపూడి దర్శకత్వం వహించారు.