పెళ్లంటూ చేసుకుంటే విడాకులు తీసుకోకూడదు.. జీవితాంతం వుండాలి: త్రిష

Trisha

తాను పెళ్లి చేసుకుంటానా లేదా అనే దానిపై తనకు ఎలాంటి ఆసక్తి లేదని కోలీవుడ్ సీనియర్ నటి త్రిష కృష్ణన్ స్పష్టం చేశారు. కమల్ హాసన్‌తో కలిసి తాను నటిస్తున్న 'థగ్ లైఫ్' సినిమా ప్రమోషన్లలో భాగంగా ఇటీవల నిర్వహించిన ఇంటర్వ్యూలో త్రిష, వివాహ వ్యవస్థపై తనకు నమ్మకం లేదని సంచలనాత్మక వ్యాఖ్యలు చేసింది.

తాజా ఇంటర్వ్యూలో, వివాహం గురించి మీ ఆలోచనల గురించి అడిగినప్పుడు, త్రిష ఆశ్చర్యకరమైన సమాధానం ఇచ్చింది. వివాహం పట్ల తనకు ప్రత్యేకమైన ఆసక్తి లేదని ఆమె స్పష్టం చేసింది. ఈ సమాధానం విన్న కమల్ హాసన్ ఆశ్చర్యపోయారని తెలుస్తోంది.

ఇక త్రిష ప్రేమలో ఉందని, త్వరలోనే పెళ్లి చేసుకోబోతోందని ఇటీవలి ఊహాగానాలు వినిపించాయి. ఈ పుకార్లను త్రిష తీవ్రంగా ఖండించింది. తాను ఎప్పుడు పెళ్లి చేసుకుంటానో తనకు కూడా తెలియదని ఆమె పేర్కొంది. అయితే, తన హృదయానికి దగ్గరయ్యే వ్యక్తిని కలిస్తే, తాను ఖచ్చితంగా వివాహం గురించి ఆలోచిస్తానని ఆమె చెప్పింది. తాను వివాహం చేసుకునే వ్యక్తి జీవితాంతం తనతోనే ఉండాలనే దృఢ నిశ్చయాన్ని కలిగి ఉండాలని ఆమె స్పష్టం చేసింది. అప్పుడే పెళ్లి చేసుకోవడానికి అంగీకరిస్తానని చెప్పింది.

పెళ్లి చేసుకుని, ఆ తర్వాత విడాకులు తీసుకోవడానికి తాను ఇష్టపడనని త్రిష తెలిపింది. వివాహం చేసుకున్న చాలా మంది అసంతృప్తికరమైన జీవితాలను గడుపుతున్నారని ఎత్తి చూపింది. త్రిష ప్రస్తుతం థగ్ లైఫ్ తో పాటు, మెగాస్టార్ చిరంజీవితో కలిసి తెలుగు చిత్రం విశ్వంభరలో కూడా నటిస్తోంది. ఇది ఆమె స్టాలిన్ తర్వాత చిరంజీవితో కలిసి చేస్తున్న తదుపరి సినిమా కావడం విశేషం.