టాలీవుడ్ సూపర్‌ స్టార్‌ మహేష్ బాబు, నమ్రతల గారాలపట్టి సితార పోటీ లేకుండా గెలిచేసిందని కుందనపు బొమ్మ సమంత అంటోంది. మహేష్‌బాబు, సమంత జంటగా నటించిన 'బ్రహ్మోత్సవం' సినిమాలో సమంత చెప్పిన డైలాగును సితార చెప్పిన వీడియో సోషల్ మీడియాలో వైరల్‌గా మారిన సంగతి తెలిసిందే. ఆ డైలాగుతో పాటు సితారకు సంబంధించిన పలు వీడియోలను మహేష్ అభిమానులు కామెంట్లు, షేర్లతో హోరెత్తించారు.
ఈ క్రమంలో ఈ సినిమాలో సమంత చెప్పిన 'ఏడు తరాలా.. వెతికితే దొరకనంత మందా..! కలిస్తే వదులుకోలేనంత మందా..!' అనే డైలాగ్‌ను సితార ముద్దు ముద్దుగా చెప్పింది. సమంత చెప్పిన డైలాగును తన ముద్దుముద్దు మాటలతో - క్యూట్ క్యూట్ ఎక్స్‌ప్రెషన్స్‌తో ఎంతో చక్కగా చెప్పింది సితార. ఈ వీడియోను నమ్రతా ట్విట్టర్ ద్వారా సమంతకు షేర్ చేసింది. ఈ వీడియో చూసిన మహేష్ అభిమానులు కూడా లైకులు కొట్టకుండా ఎలా ఉంటారు చెప్పండీ! ఇక కామెంట్లూ షేర్లు... చెప్పాల్సిన పనే లేదు.
ఈ వీడియోను ఓ అభిమాని తయారు చేసి పెట్టగా, అదే వీడియోకు తను చెప్పిన వీడియోను జత చేసిన సమంత ట్వీట్ చేస్తూ... 'పోటీ లేకుండా తనే గెలిచింది' అంటూ కామెంట్‌ పెట్టింది. కాగా, సితార తన బెస్ట్ ఫ్రెండ్ అని సమంత గతంలో చెప్పిన సంగతి తెలిసిందే. ఆ సినిమా ఆడియో వేడుకలో కూడా సమంత ఒళ్లో కూర్చుని, ఆమెతో కబుర్లు చెబుతూ సితార సందడి చేసిన సంగతి అందరికి తెలిసిందే. సితార చెప్పిన డైలాగులతోపాటు... ఆ డైలాగులు చెబుతున్నప్పుడు పెడుతున్న ఫేస్ ఫీలింగ్స్ మరీ ముద్దొచ్చేలా ఉన్నాయి.