పాకిస్థాన్‌కు చెందిన బాలీవుడ్ నటి వీణా మాలిక్‌కు పాకిస్థాన్‌లోని గిల్గిత్-బాల్టిస్తాన్‌లో తీవ్రవాద వ్యతిరేక కోర్టు జైలు శిక్ష విధించింది. అయితే, తనకు, తన భర్తకు విధించిన జైలు శిక్షపై నటి వీణామాలిక్ ఆశ్చర్యం వ్యక్తం చేసింది. దేశ న్యాయవ్యవస్థపై తనకు నమ్మకం ఉందని, న్యాయం కోసం పోరాడేందుకు ఆలోచన చేస్తున్నట్టు ఓ ప్రకటనలో తెలిపింది.
ఇదే అంశంపై ఆమె స్పందిస్తూ ఈ విషయం నాకు షాక్ కలిగించింది. అయినా, పాకిస్థాన్ ఉన్నత న్యాయస్థానాలు, న్యాయవ్యవస్థపై నాకు పూర్తి విశ్వాసం ఉంది. ఈ కోర్టు మిగతా కోర్టుల కంటే ప్రత్యేకంగా వ్యవహరిస్తుందని ఆమె పేర్కొన్నారు.
కాగా, ఓ టీవీ షో కార్యక్రమంలో పాల్గొన్న వీణా, ఆమె భర్త.. దైవ దూషణ జరిగిందంటూ ఆరోపణలు వచ్చాయి. ఆ కార్యక్రమంలో పాల్గొన్న కారణంగా వీణా, ఆమె భర్త బషీర్‌లతో పాటు జియోటీవీ ఛానల్ అధిపతి మిర్ షకీల్-ఉర్-రహమాన్ లకు 26 ఏళ్ల జైలు శిక్ష, రూ.13 లక్షల జరిమానా విధించిన సంగతి తెలిసిందే.