భారతరత్న అవార్డు గ్రహీత, మాస్టర్ బ్లాస్టర్ సచిన్ రమేష్ టెండూల్కర్ గారాల పట్టి సారా బాలీవుడ్ తెరంగేట్రం చేయనుందని జోరుగా ప్రచారం జరుగుతోంది. సారా తన తొలి సినిమాలో బాలీవుడ్ యువ హీరో షాహిద్ కపూర్‌తో కలిసి నటించనుందనే వార్త బాలీవుడ్ మాత్రమే కాకుండా ప్రపంచ వ్యాప్తంగా చర్చనీయాంశమైంది.
ముంబైలోని ధీరూభాయి అంబానీ ఇంటర్నేషనల్ స్కూల్ లో విద్యనభ్యసిస్తున్న 18 ఏళ్ల వయస్సున్న సారా, చూడటానికి అచ్చం సినిమా హీరోయిన్ లాగే కనిపిస్తోందని బాలీవుడ్ జనాలు అంటున్నారు.
తన తండ్రి మైదానంలో ఉంటే.. తల్లి, తమ్ముడితో కలిసి సారా అప్పుడప్పుడూ మ్యాచ్‌లు చూసేందుకు వచ్చేది. ఇటీవలి ఐపీఎల్ మ్యాచ్‌లలోనూ ఆమె పలుమార్లు క్రికెట్ స్టేడియాల్లో కనిపించింది. ఇలా మ్యాచ్‌లు చూసేందుకు స్టేడియంకు వచ్చిన సారాను చూసిన పలువురు బాలీవుడ్ ప్రముఖులు ఆమెను సినిమాల్లోకి పంపాలని సచిన్ ముందు ప్రతిపాదించారట. అయితే సారాను సినిమాల్లోకి పంపేందుకు సచిన్ సుముఖంగా లేరని అతడి సన్నిహితులు అంటున్నారు.
భార్య అంజలి లాగానే డాటర్‌ను వైద్యురాలిగానే చూడాలని సచిన్ భావిస్తున్నారు. అలాకాని పక్షంలో తన వ్యాపారాలన్ని ఆమె చేతిలో పెట్టేందుకూ సచిన్ నిర్ణయించుకున్నారని విశ్వసనీయ సమాచారం. మరి సారా ఇష్టమేమిటో..!? తండ్రికి తగ్గ తనయ అనిపించుకుంటుందో..? లేక తండ్రి పర్మిషన్‌తో సినిమాల్లో నటిస్తుందో తెలియాలంటే వేచి చూడాల్సిందే.!