ఆత్మహత్యల నేపథ్యంలో అక్యూట్‌ యాంగిల్‌ పతాకంపై రఘు బెల్లంకొండ స్వీయ దర్శకత్వంలో నిర్మించిన 'మళ్ళీ రాదోయ్ లైఫ్' చిత్రం ఇటీవలే విడుదలైంది. ఈ చిత్రాన్ని తెలంగాణ రాష్ట్ర ప్రభుత్వ సలహాదారు డా. కె.వి. రమణాచారి వీక్షించారు. అనంతరం ఆయన మాట్లాడుతూ... సమాజంలో రైతు పాత్ర చాలా గొప్పదనీ, ఆత్మహత్యల నేపథ్యంలో రూపొందిన ఈ సినిమాలో ప్రతి ఒక్కరూ తమతమ పాత్రల్లో జీవించారనీ, ఈ చిత్రం చేయడంతో రఘు సార్థకత పొందారని పేర్కొన్నారు.
చిన్న చిత్రాలకు జరిగిన అన్యాయమే ఈ చిత్రానికి జరిగిందనీ, రెండు వారాలయినా ఆదరణ లభిస్తోందంటే మామూలు విషయంకాదనీ తెలిపారు. దర్శక నిర్మాత రఘు బెల్లంకొండ మాట్లాడుతూ... రెండేళ్ళలో 350 మంది రైతులు ఆత్మహత్యలు చేసుకున్నారనీ, పేపర్లలో చదివి సులువుగా తీసుకుంటున్నారనీ, ఏదైనా చెయ్యాలనే ఆలోచనతో సినిమాగా తీశానని తెలిపారు. పిల్లలు, పెద్దలు కూడా ఈ సినిమాను ఆదరిస్తున్నారని హీరోగా చేసిన అల్తాఫ్‌ తెలిపారు.