తాజాగా శాంభవి ఐపీఎస్ చిత్రంలోని ఓ సీన్‌ను రాజమౌళి కాపీ చేశారంటూ వీడియో ఒకటి సోషల్ మీడియాలో హల్ చల్ చేస్తోంది. దీనిపై రాజమౌళి మాట్లాడుతూ.. ‘శాంభవి ఐపీఎస్’ సినిమాలోని ఓ సీన్‌ను ‘విక్రమార్కుడు’ సినిమా కోసం కాపీ కొట్టలేదని వివరణ ఇచ్చారు.
‘‘ఇంతకు ముందు నేను కొన్ని చిత్రాల నుంచి, నవలల నుంచి కాపీ చేశాను. కానీ, శాంభవి ఐపీఎస్ చిత్రంలోని సీన్‌ను కాపీ కొట్టలేదు. చాలా కాలం క్రితం మా నాన్న ఆ సీన్‌ను రాశారు. శాంభవి ఐపీఎస్ చిత్రంలోకి ఆ సీన్ ఎలా వచ్చిందో అర్థం కావడం లేదు. ఆ వ్యవహారం గురించి పట్టించుకునేంత టైమ్ కూడా నాకు లేదు. నా వివరణ కేవలం నన్ను విశ్వసించే వారి కోసం మాత్రమే’’ అని రాజమౌళి ఫేస్ బుక్, ట్విట్టర్‌లో వివరణ ఇచ్చారు.
రాజమౌళి - రవితేజ కాంబినేషన్‌లో వచ్చిన హిట్ సినిమా ‘విక్రమార్కుడు’లో పోలీసులను విలన్ ఎగతాళి చేస్తాడు. ఆ సమయంలో భవనంపై నుంచి పడటంతో మెడలోని బెల్ట్ ఉరిపడటంతో విలన్ మరణిస్తాడు. శాంభవి ఐపీఎస్‌లో కూడా అలాంటి సీన్... ఒకటి ఉంటుంది. అయితే, ఆ సీన్ మొత్తం సేమ్ టు సేమ్ విక్రమార్కుడును పోలి ఉండటంతో కాపీ కొట్టారన్న సందేహాలు తలెత్తాయి.