హిందీ ''భాగంభాగ్'' చిత్నాన్ని తెలుగులో ''బ్రహ్మానందం డ్రామా కంపెనీ'' (హీరోయిన్ జంప్)గా రీమేక్ చేస్తున్నారు. ఈ చిత్రం పాటలు గురువారం మార్కెట్లో ఆదిత్య మ్యూజిక్ సంస్థ విడుదల చేసింది.
ఈ సందర్భంగా హైదరాబాద్‌లో ఏర్పాటుచేసిన కార్యక్రమంలో ముఖ్య అతిథి డాక్టర్ డి.రామానాయుడు ఆడియోను విడుదల చేసి చిత్ర హీరోయిన్ కమలినీ ముఖర్జీకి అందజేశారు. అనంతరం తమ్మారెడ్డి భరద్వాజ సీడీని ఆవిష్కరించి నందమూరి తారక్‌కు అందించారు.
ఈ సందర్భంగా నటుడు బ్రహ్మానందం మాట్లాడుతూ, గతంలో ఈ చిత్రం దర్శకుడు శ్రీకాంత్, నిర్మాత పల్లి కేశవరావు నిర్మించిన 'శ్రీరామచంద్రులు' చిత్రంలో మంచి పాత్ర పోషించాను. ఆ చిత్రం హిట్ కావడంతో శ్రీరామచంద్రులు బేనర్‌గా పెట్టి 'బ్రహ్మానందం డ్రామా కంపెనీ' హీరోయిన్ జంప్ అంటూ సినిమా తీశారు.
టైటిల్ అంతా నా పేరు పెట్టారుకాబట్టి తప్పకుండా విజయం కావాలని కోరుకుంటాను. ఈ చిత్రం ఎండాకాలంలో నవ్వులు కురిపిస్తుంది అని చెప్పగలను. సాయికార్తీక్ చక్కటి మ్యూజిక్ ఇచ్చాడు' అన్నారు.
నటుడు శివాజీ మాట్లాడుతూ, ఒకప్పుడు పల్లికేశవరావు దగ్గర పనిచేద్దామనుకున్నాను. ఈనాడు ఆయన నిర్మించే చిత్రంలో హీరోగా చేయడం ఆనందంగా ఉంది. భాగంభాగ్ చిత్రంలోని తప్పుల్ని సరిచేస్తూ ఈ చిత్రాన్ని దర్శకుడు చక్కగా తెరకెక్కిస్తున్నారు అని చెప్పారు. ఈ చిత్రంలో తానూ ఓ భాగమైనందుకు ఆనందంగా ఉందని నటుడు రవికృష్ణ అన్నారు.
చిత్రంమంతా తన పాత్రచుట్టూ నడుస్తుందని కమలినీ ముఖర్జీ చెప్పారు. ఈ చిత్రాన్ని మార్చి నెలాఖరులో రిలీజ్ చేయడానికి సన్నాహాలు చేస్తున్నామని నిర్మాత చెప్పారు.