తెలంగాణ రాష్ట్ర అసెంబ్లీ తొలి బడ్జెట్‌ సమావేశాల నిర్వహణపై ఆ రాష్ట్ర ప్రభుత్వం దృష్టి సారించింది. ఇప్పటివరకు పలు దఫాలుగా అధికారులతో ప్రభుత్వ శాఖల వారీగా సమీక్షా సమావేశాలు జరిపిన ముఖ్యమంత్రి కె.చంద్రశేఖర్‌ రావు, కీలకమైన బడ్జెట్‌ రూపకల్పన, అసెంబ్లీ సమావేశాల తేదీల ఖరారుకు సన్నాహాలు ప్రారంభించారు.
వచ్చే ఐదేళ్లలో తెలంగాణ అభివృద్ధి, సంక్షేమానికి ఈసారి బడ్జెట్‌ కేటాయింపులు పునాదిగా సీఎం కేసీఆర్‌ భావిస్తున్నారు. ఈ మేరకు అసెంబ్లీ తొలి బడ్జెట్‌ సమావేశాలను రాష్ట్ర ప్రభుత్వం అత్యంత ప్రతిష్టాత్మకంగా తీసుకుంటోంది. ఇందుకు తమ పార్టీ ఎమ్మెల్యేలు, ఎమ్మెల్సీలనూ సిద్ధం చేసే పనికి సీఎం కేసీఆర్‌ పూనుకున్నారు.
ఈ మేరకు టీఆర్‌ఎస్‌ ఎమ్మెల్యేలు, ఎమ్మెల్సీలతో ఈనెల 24న పార్టీ కేంద్ర కార్యాలయం తెలంగాణ భవన్‌లో సమావేశాన్ని నిర్వహించనున్నారు. అలాగే, జిల్లాల వారీగా ఎమ్మెల్యేలతో సమావేశం నిర్వహించి బడ్జెట్‌కు సంబంధించి అసెంబ్లీ నియోజకవర్గాల వారీగా వారి ప్రాధాన్యతలు, ఆయా జిల్లాల సమస్యలను అడిగి తెలుసుకుంటారు.