హైదరాబాద్ నగరంలో మహిళలు వేధింపులకు గురవుతున్న సంఘటనలు హెచ్చుమీరిపోతున్నాయి. తాజాగా ఓ నిరుద్యోగ యువతిని ఓ ఉద్యోగి లైంగికవాంఛ తీర్చాలంటూ వేధించాడు. ఉద్యోగం కావాలంటే ఓయో గదికి వచ్చి తన కోర్కె తీర్చాలంటూ అసభ్యంగా మెసేజ్ పెట్టాడు. దీంతో బాధితురాలు పోలీసులకు ఫిర్యాదు చేసింది.
పోలీసులు తెలిపిన వివరాల ప్రకారం.. హిమాయత్‌నగర్‌కు చెందిన యువతి(28) వారం క్రితం జూబ్లీహిల్స్‌ రోడ్‌ నెం.36లోని ఓ ఇమ్మిగ్రేషన్‌ సంస్థలో ఉద్యోగం ఇంటర్వ్యూకు వెళ్లింది. ఈ కార్యాలయంలో పనిచేసే అసిస్టెంట్‌ జనరల్‌ మేనేజర్‌ సుమంత్‌ అనే ఉద్యోగితో ఆమెకు పరిచయమైంది. దీంతో వారిద్దరూ చాటింగ్‌లో మాట్లాడుకోసాగారు.
ఈ క్రమంలో ఉద్యోగం కావాలంటే.. ఓయో రూమ్‌ బుక్‌ చేశానని ఉద్యోగం అక్కడే ఇస్తానంటూ చెప్పాడు. ఆందోళన చెందిన బాధితురాలు పోలీసులకు ఫిర్యాదు చేసింది. సదరు ఇమ్మిగ్రేషన్‌ సెంటర్‌ అసిస్టెంట్‌ జనరల్‌ మేనేజర్‌ సుమంత్‌పై పోలీసులు ఐపీసీ 509 సెక్షన్‌ కింద కేసు నమోదు చేసి దర్యాప్తు చేస్తున్నారు.