తెలంగాణలో 267 నామినేషన్ల తిరస్కరణ.. బాబు మోహన్‌దే ఫస్ట్
శనివారం, 27 ఏప్రియల్ 2024 (17:26 IST)
తెలంగాణలో లోక్‌సభ ఎన్నికలకు నామినేషన్లు తిరస్కరణకు గురైన 267 మంది అభ్యర్థుల్లో మాజీ మంత్రి, నటుడు పి.బాబు మోహన్, మాజీ ఎంపీ మందా జగన్నాథం ఉన్నారు. మొత్తం 17 లోక్‌సభ నియోజకవర్గాల్లో 626 మంది అభ్యర్థుల నామినేషన్లను ఎన్నికల అధికారులు ఆమోదించారు.
మొత్తం 1,488 నామినేషన్లను 893 మంది అభ్యర్థులు దాఖలు చేశారు. అనేక మంది బహుళ నామినేషన్ సెట్లను దాఖలు చేశారు. వరంగల్ నియోజకవర్గం నుంచి స్వతంత్ర అభ్యర్థిగా బాబు మోహన్ నామినేషన్ దాఖలు చేశారు. ఆయన తన నామినేషన్‌తోపాటు 10 మంది ఓటర్ల పేర్లను సమర్పించినప్పటికీ, వారి సంతకాలను గుర్తించలేదు.
ఆసక్తికరమైన విషయం ఏమిటంటే, బాబూ మోహన్ మార్చి 24న కేఏ పాల్ ప్రజా శాంతి పార్టీలో చేరారు. పార్టీ తెలంగాణ యూనిట్ అధ్యక్షుడిగా బాబు మోహన్‌ను నియమిస్తున్నట్లు పాల్ ప్రకటించారు. వరంగల్ నియోజకవర్గం నుండి పార్టీ అభ్యర్థిగా కూడా ప్రకటించారు.
నామినేషన్ దాఖలు చేసిన తర్వాత అదే రోజు ప్రజాశాంతి పార్టీకి రాజీనామా చేసినట్లు బాబు మోహన్ వెల్లడించారు. ఫిబ్రవరిలో తనను పక్కన పెడుతున్నారని బీజేపీకి రాజీనామా చేశారు.
తెలుగు సినిమాల్లో హాస్య పాత్రలకు పేరుగాంచిన ప్రముఖ నటుడు, 1990లలో తెలుగుదేశం పార్టీ (టీడీపీ)లో చేరడం ద్వారా రాజకీయాల్లోకి ప్రవేశించారు. 1998 ఉప ఎన్నికల్లో ఆందోల్ నుంచి తొలిసారిగా ఎన్నికైన ఆయన 1999లో ఆ స్థానాన్ని నిలబెట్టుకున్నారు.
అప్పటి సమైక్య ఆంధ్రప్రదేశ్‌లో చంద్రబాబు నాయుడు మంత్రివర్గంలో కార్మిక శాఖ మంత్రిగా పనిచేశారు. 2014లో, బాబు మోహన్ టీఆర్ఎస్ (ప్రస్తుతం బీఆర్ఎస్)లో చేరారు. ఆందోల్ నుండి తెలంగాణ అసెంబ్లీకి ఎన్నికయ్యారు. టికెట్ నిరాకరించడంతో 2018లో బీఆర్‌ఎస్‌ని వీడి బీజేపీలో చేరారు.
ఇక నాగర్‌కర్నూల్‌ నియోజకవర్గంలో మంద జగన్నాథం నామినేషన్‌ను ఎన్నికల సంఘం తిరస్కరించింది. బహుజన్ సమాజ్ పార్టీ (బీఎస్పీ) అభ్యర్థిగా నామినేషన్ దాఖలు చేసిన ఆయన ‘బి’ ఫారాన్ని సమర్పించడంలో విఫలమయ్యారు.
నామినేషన్ పత్రాలపై 10 మంది అభ్యర్థులు సంతకాలు చేయాలన్న నిబంధన నెరవేరకపోవడంతో స్వతంత్ర అభ్యర్థిగా కూడా పోటీ చేసే అవకాశం ఆయనకు రాలేదు.
జగన్నాథం నాలుగుసార్లు నాగర్‌కర్నూల్‌ నుంచి ఎంపీగా ఎన్నికయ్యారు. మూడుసార్లు టీడీపీ, ఒకసారి కాంగ్రెస్‌ తరఫున ఆయన ఎన్నికయ్యారు. అన్ని నియోజకవర్గాల్లో ప్రధాన పార్టీలకు చెందిన అభ్యర్థుల నామినేషన్లను ఆమోదించారు.
ఆదిలాబాద్ నియోజకవర్గంలో బీజేపీ అభ్యర్థి జి. నగేష్‌ నామినేషన్‌పై కాంగ్రెస్‌, బీఆర్‌ఎస్‌లు కొన్ని అభ్యంతరాలు వ్యక్తం చేసినా రిటర్నింగ్‌ అధికారి ఆ అభ్యంతరాలను తిరస్కరించారు.
దేశంలోనే అతిపెద్ద పార్లమెంటరీ నియోజకవర్గమైన మల్కాజిగిరిలో గరిష్ట సంఖ్యలో నామినేషన్లు (77 మంది అభ్యర్థులు దాఖలు చేసిన 115) తిరస్కరించబడ్డాయి.
నల్గొండలో 25 మంది, కరీంనగర్‌లో 20 మంది అభ్యర్థుల నామినేషన్లు తిరస్కరణకు గురయ్యాయి. నామినేషన్ల ఉపసంహరణకు ఏప్రిల్ 29 చివరి తేదీ కాగా మే 13న ఓటింగ్ జరుగుతుంది.