రాజకీయ పరాజయాలు.. ఫామ్‌హౌస్‌లో కేసీఆర్ నవగ్రహ మహా యాగం

వరుస రాజకీయ పరాజయాలు, కేసుల తరువాత, బీఆర్ఎస్ చీఫ్ కె చంద్రశేఖర్ రావు శుక్రవారం తన ఎరవల్లి ఫామ్‌హౌస్‌లో పూజారుల సలహా మేరకు ఉదయం 11 నుండి మధ్యాహ్నం 1 గంటల మధ్య ‘నవగ్రహ మహా యాగం’ నిర్వహించారు. 

ఈ యాగంలో రావు భార్య శోభ పాల్గొన్నారు. ఈ కార్యక్రమంలో పార్టీ నాయకులు హరీశ్‌రావు, ఎమ్మెల్సీ కవిత భర్త అనిల్‌కుమార్‌ తదితరులు పాల్గొన్నారు. అసెంబ్లీ ఎన్నికల్లో అధికారాన్ని కోల్పోయి, లోక్‌సభ ఎన్నికల్లో చిత్తుగా ఓడిపోయిన కేసీఆర్, ఆయన పార్టీ గత కొన్ని నెలలుగా పరాజయాలను ఎదుర్కొంది. 

రాజకీయ ఎదురుదెబ్బతో పాటు, ఆయన బాత్రూంలో పడిపోవడంతో తుంటి మార్పిడి శస్త్రచికిత్స చేయించుకోవలసి వచ్చింది. ఫలితంగా కొంతకాలం ప్రజా జీవితానికి దూరంగా ఉన్నారు. 

కాళేశ్వరం విచారణ, ఢిల్లీ లిక్కర్ పాలసీ స్కామ్‌లో కవిత జైలుకెళ్లడం వంటి కేసులను పార్టీ ఎదుర్కొంటోంది. దీంతో కేసీఆర్ తన ఫామ్ హౌస్ లో యాగం నిర్వహించారు. ఈ యాగం ఫలితంగా మంచి జరుగుతుందని.. తెలంగాణ తమ పార్టీ పుంజుకుంటుందని టీఆర్ఎస్ వర్గాలు ఆశాభావం వ్యక్తం చేస్తున్నారు.