హైదరాబాదులో చిన్నారి కిడ్నాప్.. ఆడుకుంటుంటే ఆటోలో ఎత్తుకెళ్లాడు...

హైదరాబాద్‌లో చిన్నారి కిడ్నాప్‌కు గురైంది. రోడ్డుపై ఆడుకుంటున్న బాలికను ఓ ఆగంతకుడు ఆటోలో ఎక్కించుకుని తీసుకెళ్లిపోయాడు. దీనికి సంబంధించిన దృశ్యాలు సీసీ కెమెరాల్లో రికార్డు అయ్యాయి. వివరాల్లోకి వెళితే.. ప్రియాంక అనే మహిళ తన సోదరుడితో కలిసి హైదరాబాద్ బేగంబజార్ ఛత్రి ప్రాంతంలో నివసిస్తోంది. 

అయితే శనివారం సాయంత్రం తన సోదరుడు కుమార్తె ప్రగతి( 6)తో కలిసి కట్టెలమండిలోని తన తల్లి వద్దకు వచ్చింది. యాంక సోదరి కుమారుడు హృతిక్‌తో కలిసి బాలిక ఆడుకోవడానికి ఇంటి సమీపంలోని ముత్యాలమ్మ తల్లి ఆలయం వద్దకు వెళ్లింది. కొద్దిసేపటి తర్వాత హృతిక్ ఒక్కడే ఇంటికి వచ్చాడు. 

ప్రగతి రాకపోవడంతో చుట్టుపక్కల ప్రాంతాలను బాలిక మేనత్త ప్రియాంక వెతికారు. ఎంతసేపటికీ చిన్నారి ఆచూకీ లభ్యం కాకపోవడంతో అబిడ్స్ పోలీసులకు ఫిర్యాదు చేశారు. కేసు నమోదు చేసిన పోలీసులు ఘటన జరిగిన ప్రాంతంలో సీసీటీవీ ఫుటేజ్‌ను పరిశీలించారు. 

సీసీటీవీలో జరిగిందంతా రికార్డ్ అయ్యింది. వెంటనే పోలీసులు కేసు నమోదు చేసుకుని దర్యాప్తు చేపట్టారు. చిన్నారి ప్రగతిని నిందితుడు ఏం చేస్తాడో అని కుటుంబసభ్యుల్లో తీవ్ర ఆందోళన నెలకొంది. స్థానికంగా కిడ్నాప్ ఘటన కలకలం రేపుతోంది.