ప్రాక్టీసు మ్యాచ్‌: పాకిస్థాన్‌కు దక్షిణాఫ్రికా షాక్

దక్షిణాఫ్రికాతో ట్రెండ్‌బ్రిడ్జ్‌లో సోమవారం జరిగిన ప్రాక్టీసు మ్యాచ్‌లో పాకిస్థాన్ జట్టు 59 పరుగుల తేడాతో ఘోర పరాజయం పాలైంది. ఇంగ్లాండ్‌లో జూన్ 5న ప్రారంభం కాబోతున్న ఐసీసీ ట్వంటీ- 20 ప్రపంచకప్ సన్నాహాల్లో భాగంగా జరిగిన ఈ మ్యాచ్‌లో 187 పరుగుల లక్ష్యంతో బరిలో దిగిన పాకిస్థాన్ 19.4 ఓవర్లలో 127 పరుగులు మాత్రమే చేసింది.

స్టెయిన్ (2 వికెట్లు), వాండర్‌మెర్వ్ (2), బోథా (2) రాణించడంతో దక్షిణాఫ్రికా ఈ మ్యాచ్‌లో అలవోకగా విజయం సాధించింది. పాకిస్థాన్ బ్యాట్స్‌మెన్‌లో షెహజాద్ (31) మినహా మిగిలినవారందరూ విఫలం అయ్యారు. అంతకుముందు టాస్ గెలిచి బ్యాటింగ్ చేసిన దక్షిణాఫ్రికా నిర్ణీత 20 ఓవర్లలో ఏడు వికెట్ల నష్టానికి 187 పరుగులు చేసింది. కెప్టెన్ గ్రేమ్ స్మిత్ (70), కలీస్ (26) ధాటిగా ఆడటంతో దక్షిణాఫ్రికా ప్రత్యర్థి ముందు బలమైన లక్ష్యాన్ని ఉంచింది. గిబ్స్ (42), మోర్కెల్ (32) కూడా పాక్ బౌలర్లను బెంబేలెత్తించారు.