ప్రతిష్టాత్మక ఫ్రెంచ్ ఓపెన్ టెన్నిస్ టోర్నమెంట్ పురుషుల సింగిల్స్ ఫైనల్లో రన్నరప్‌గా నిలిచిన స్విజ్ మాస్టర్ రోజర్ ఫెదరర్‌కు హాలె టెన్నిస్ టోర్నమెంట్లోనూ చుక్కెదురైంది. ఆస్ట్రేలియాకు చెందిన మాజీ నెంబర్ వన్ లిటన్ హెవిట్‌తో జరిగిన మ్యాచ్‌లో రోజర్ ఫెదరర్ మెరుగ్గా రాణించలేకపోయాడు. తద్వారా హెవిట్ చేతిలో స్విజ్ మాస్టర్ ఖంగుతిన్నాడు.
అయితే తైవాన్‌కు చెందిన యెన్-సన్ లు హాలే ఓపెన్ రెండో రౌండ్లోకి దూసుకెళ్లాడు. హాలే ఏటీపీ టోర్నీ తొలి రౌండ్లో ఫిన్‌లాండ్‌కు చెందిన జార్ఖో నిమినేన్‌తో తలపడిన లు 7-6 (7/2), 6-3 పాయింట్ల తేడాతో విజయాన్ని నమోదు చేసుకున్నాడు.
ఈ సందర్భంగా లు మాట్లాడుతూ.. గ్రాస్ కోర్టులో నిమినేన్ ధీటుగా రాణిస్తాడు. నిమినేన్‌తో టఫ్ మ్యాచ్ ఆడాను. గ్రాస్ కోర్టులో తాను కూడా మెరుగ్గా ఆడటం ఎంతో సంతోషంగా ఉందని లు వెల్లడించాడు.
మరోవైపు ఏడో సీడ్ అలెగ్డాండర్ డొగొపొలొవ్ (ఉక్రెయిన్) కూడా హాలె టెన్నిస్ రెండో రౌండ్లోకి ప్రవేశించాడు. హాలెండ్‌కు చెందిన రాబిన్ హాసేతో బరిలోకి దిగిన డొగొపొలొవ్ 6-7 (4/7), 6-4, 6-4 పాయింట్ల తేడాతో విజయం సాధించాడు.