తమిళనాడులోని రామనాథపురం జిల్లాలో గల రామేశ్వరాన్ని సందర్శిస్తే ఓ అద్భుతమైన, అనిర్వచనీయమైన అనుభూతి మన సొంతమవుతుంది. ఓ పుణ్యక్షేత్రంగా, ఓ పర్యాటక స్థలంగా విలసిల్లుతోన్న రామేశ్వరంలో పర్యాటకులకు కనువిందు చేయడానికి అనేక విశేషాలున్నాయి.
దాదాపు 62 చదరపు కిలోమీటర్ల విస్తీర్ణంలో ఏర్పడిన ఈ ద్వీప ప్రాంతములో రామనాథ స్వామి ఆలయం ఒక విశిష్ట స్థానాన్ని ఆక్రమించింది. అలాగే ఇక్కడ ఉన్న కోటి తీర్థాలు, రామపాదాలు, ధనుష్కోడి, విభిషనాలయం లాంటి అనేక పర్యాటక ప్రదేశాలు ఉన్నాయి.
రామనాథ స్వామి ఆలయం ద్వాదశ జ్యోతిర్లింగాల్లో ఒకటిగా ఈ రామనాథ స్వామి దేవాలయం ప్రాముఖ్యాన్ని సంపాదించుకుంది. సముద్రానికి దగ్గర్లో నిర్మించినబడిన ఈ ఆలయం 12వ శతాబ్ధంలో నిర్మించబడినట్టు చెబుతారు. దాదాపు 865 అడుగుల పొడవు, 657 అడుగుల వెడల్పుతో నిర్మించబడిన ఈ ఆలయం భారతదేశంలోని ప్రముఖ దేవాలయాల్లో ఒకటిగా విలసిల్లుతోంది.
ఈ దేవాలయానికి పక్కనే ఉన్న మూడు మహా మండపాలు నాలుగువేల అడుగుల పొడవుతో ప్రపంచ ప్రసిద్ధి పొందాయి. ఈ ప్రాకారాల్లో రామేశ్వరుడు, పార్వతీదేవి ఆలయాలున్నాయి. ఈ ఆలయ ప్రాంగణంలో వివిధ రుచులను కల్గిన 22 బావులున్నాయి. అలాగే ఈ ఆలయ మండపాల్లో వరసగా నిర్మించబడిన శివలింగాలు పర్యాటకులను విశేషంగా ఆకర్షిస్తాయి.
ఈ ఆలయానికి సమీపంలో ఉన్న ఆంజనేయస్వామి ఆలయంలో నీటిలో తేలే రాళ్లు ఉండడం విశేషం. ఆనాడు రాముడు సీతా దేవి కోసం లంకకు వారధి నిర్మించ తలపెట్టినప్పుడు ఈ రాళ్లతోనే వారధి నిర్మించారని పురాణాలు చెబుతున్నాయి.
క్షేత్ర విశేషాలు సీతాదేవిని రావణుడు అపహరించుకుని లంకకు వెళ్లిపోయినపుడు రాముడు ఈ రామేశ్వరం ప్రాతం నుంచే లంకకు వారథి నిర్మించి అక్కడకు వెళ్లి రావణుడిని సంహరించి సీతను వెనక్కి తెచ్చుకున్నాడని పురాణాలు చెబుతున్నాయి. రావణుడిని చంపిన తర్వాతా ఆ హత్యాపాపాన్ని కడిగేసుకోవడానికే రాముడు ఈ రామేశ్వరంలో రామనాధుని ప్రతిష్టించాడని కూడా పురాణాలు చెబుతున్నాయి.
రవాణా సౌకర్యాలు ముందుగా చెప్పినట్టు రామేశ్వరం ఓ దీవి. ఇక్కడకు చేరుకోవడానికి సముద్రం మీదుగా నిర్మించబడిన రైలు వంతెన, బస్సు వంతెన అందుబాటులో ఉన్నాయి. రామేశ్వరం నుంచి శ్రీలంక చాలా దగ్గరగా కన్పిస్తుంది. శ్రీలంక రాజధాని అయిన కొలంబో నగరము రామేశ్వరానికి దాదాపు 115 కిలోమీటర్ల దూరంలో ఉంది.