ఎవరి ప్రత్యేకత వారిదే.. నిరాశ చెందకండి!

ఈ ప్రపంచంలో ఎవరి ప్రత్యేకత వారిదేనని మీరు గుర్తించాలి. ఒకరికి ఓ రంగంలో ప్రతిభ ఉంటే మీకు మరో రంగంలో ఉంటుంది. అందుకని వాళ్లు ఫలానా పని బాగా చేస్తారు కానీ నాకు రాదని నిరాశ చెందకండి. ప్రయత్నిస్తే మీరూ చేయగలరు. మిమ్మల్ని వెనక్కి నెట్టే ఇలాంటి విషయాలలో మీరు కొన్ని జాగ్రత్తలు తీసుకోండి చాలు విజయం మీదే అవుతుంది.

ముందుగా మిమ్మల్ని వెనక్కి నెట్టే అంశాలను విడిగా ఓ పేపర్‌పై రాసుకోండి. ఏ విషయంలో మీరు బలహీనులవుతున్నారని గుర్తించండి. మీకంటే అవతలి వారు దేనిలో ప్రత్యేకంగా ఉన్నారో గమనించండి. వాటిని క్రమబద్ధంగా రాసుకుని వాటిలో మీ వద్ద ఏవి లేవో తెలుసుకోండి. తర్వాత వాటిని ఎలా జయించాలో ఆలోచించండి. పట్టుదల వదలకుండా ప్రయత్నించి చూడండి.

అలాగే మీ బలహీనతల్ని చూసి వెక్కిరించే వారిని పట్టించుకోవద్దు. మిమ్మల్ని మీరు ఉన్నత స్థానంలో నిలుపుకోండి. ఈ చర్యలు చేపడితే మీరు విజేతగా నిలిచేందుకు మార్గం సులభమైనట్టే. ప్రతి ఒక్కరిలో ఏదో ఓ రంగంలో ప్రతిభ ఉంటుందని మనం తెలుసుకోవాలి. అయితే ఆ రంగాలలో మన ప్రతిభను మెరుగు పరుచుకునేందుకు కృషి చేయండి. చక్కని ఫలితాలను పొందుతారు. 

తోటి వారిని మాటలతో బాధపెట్టకండి. చక్కని మాటతీరుతో, స్నేహ భావంతో మెలగండి. మీ వద్ద ఉన్న లోపాలు దూరంగా వెళ్లిపోతాయి. అందరూ మీ చుట్టూ చేరాలని మీ మనసులో ఉందా? అది నెరవేరాలంటే మీ పనిలో శ్రద్ధపెట్టి ఏకాగ్రతతో పనిచేయండి. మీ ప్రవర్తనను ఎప్పటికప్పుడు చూసుకోండి. తద్వారా అందరూ మీ చుట్టూ చేరతారు.