అతిఖర్చు వద్దు బాబోయ్!: ఇవిగోండి టిప్స్!

ప్రకటనలు, ప్రమోషన్ కార్యక్రమాలే ప్రజల అతిఖర్చుకు ప్రధాన కారణమవుతున్నాయి. ఈ ప్రకటనలు అవసరాలను కూడా సృష్టించి వినియోగదారుడి బడ్జెట్‌ను ప్రభావితం చేస్తున్నాయని సైకాలజిస్టులు చెబుతున్నారు. అతిఖర్చు వల్ల ఆర్థిక పతనానికి దారి తీస్తుందని సైకాలజిస్టులు హెచ్చరిస్తున్నారు.

భారీ ధరలకు ఉత్పత్తులను, సేవలు అందించడం కోసం బ్రాండ్లు ఆవిర్భవించాయి. ఏ బ్రాండ్ ప్రత్యేకత ఆ బ్రాండ్‌కు ఉంటుంది. వీటిని ఎంతైనా వెచ్చించి కొనేయడం ప్రస్తుతం ఫ్యాషనైపోయింది. హాలీవుడ్‌లో వచ్చిన కన్‌ఫెషన్స్ ఆఫ్ ఎ షపోహాలిక్ సినిమా అతిఖర్చుకు, షాపింగ్‌కు బానిస అయిన ఓ మహిళ జీవితానికి చక్కని ఉదాహరణ. ఇందులో ప్రధాన పాత్రధారి ఒక్క రోజు కూడా షాపింగ్ చేయకుండా ఉండలేదు. అప్పు చేసైనా సరే ఖరీదైన బ్రాండ్లనే కొంటుంది. ఇలా ఈమెకు ఉద్యోగం ఊడిపోతుంది. తల్లిదండ్రులు, స్నేహితులు దూరమవుతారు. ఈ సినిమా కథ నిజ జీవితానికి దగ్గరగా వుందని, నిజ జీవితంతో ఖర్చులపై నియంత్రణ లేకపోతే ఇంతకంటే దారుణమైన పరిస్థితులు ఎదుర్కోవాల్సి వస్తుందని సైకాలజిస్టులు హెచ్చరిస్తున్నారు. అందుచేత ఖర్చులను తప్పకుండా నియంత్రించుకోవాలి.

* ఖర్చులను నియంత్రించాలంటే బడ్జెట్ వేసుకోవాలి. 

* తప్పనిసరి ఖర్చులపైనే దృష్టి సారించాలి

* అవసరాలు పూర్తయ్యాక కోరికల గురించి ఆలోచించాలి

* డబ్బు మిగిలింది కదా.. అంటూ విచ్చలవిడిగా ఖర్చు చేయకూడదు

* విహారయాత్రలకు మీ బడ్జెట్‌లో కొంత మాత్రమే కేటాయించండి.. అందుకు తగ్గట్లు ప్రదేశాలను ఎంచుకోవాలి. 

* అప్పులతో ఆర్థిక పతనం ఖాయం.. వాటికి ఎంత వీలవుతుందో అంత దూరంగా ఉండాలి 

* గృహోపకరణాలపై ఖర్చులు అవసరం మేరకే ఉండాలి. 

* క్రెడిట్ కార్డులను అవసరానికి తగిన మేరకే ఉపయోగించాలి అని ఆర్థిక నిపుణులు సూచిస్తున్నారు. ఇలా చేస్తే మీ ఇంటిని చక్కదిద్దుకోవడమే గాకుండా.. ఆర్థిక పతనానికి కారణం కాకుండా ఉంటారని సైకాలజిస్టులు అంటున్నారు.