ఒలింపిక్ ప్రారంభోత్సవ వేడుకలకు సోనియా

చైనా తొలిసారి ఆతిథ్యమిస్తున్న బీజింగ్ ఒలింపిక్ క్రీడలకు కాంగ్రెస్ పార్టీ అధినేత్రి సోనియా గాంధీ వెళుతున్నారు. క్రీడల ప్రారంభోత్సవ వేడుకలు తిలకించటానికి సోనియా గాంధీ పయనమవుతున్నారు. సోనియాతో ఆమె తనయుడు కాంగ్రెస్ పార్టీ జనరల్ సెక్రటరీ, అమేథీ ఎంపీ రాహుల్ గాంధీ కూడా బయలుదేరుతున్నారు.

కమ్యూనిస్ట్ పార్టీ ఆఫ్ చైనా ఆహ్వానం మేరకు సోనియా గాంధీ వెళుతున్నారని ఏఐసీసీ ప్రతినిధి వీరప్ప మెయిలీ చెప్పారు. బీజింగ్ మూడు రోజుల పర్యటనలో భాగంగా న్యూఢిల్లీ నుంచి బుధవారం రాత్రి బయలుదేరుతారని వివరించారు. ఆమె వెంట రాహుల్, ప్రియాంకా వాద్రా కుటుంబం వెళుతుందని తెలిపారు.

చైనా ప్రభుత్వ అతిథి హోదాలో బీజింగ్‌కు సోనియా గాంధీ వెళుతున్నారని వివరించారు. బీజింగ్ ఒలింపిక్ ప్రారంభోత్సవ వేడుకలు జరిగే బర్డ్ నెస్ట్ స్టేడియంలో వీవీఐపీ ఎన్‌క్లోజర్‌లో కాకుండా సెలబ్రిటీల విభాగంలో సోనియా కూర్చుని తిలకిస్తారని మెయిలీ వెల్లడించారు.