దేశ రాజధాని న్యూఢిల్లీలో జరుగనున్న ఎనిమిదవ ప్రవాసీ భారతీయ దివస్ (పీబీడీ)లో ప్రధానంగా దేశ ఆర్థిక ప్రగతిపై చర్చించనున్నట్లు కేంద్ర వలస వ్యవహారాల శాఖా మంత్రి వాయలార్ రవి వెల్లడించారు. కాగా.. ఈ ప్రవాసీ భారతీయ దివస్‌కు పదిహేను వందలమంది భారత సంతతి ప్రతినిధులు హాజరయ్యే అవకాశం ఉందని ఆయన తెలిపారు.
ఈ విషయమై న్యూఢిల్లీలో మంత్రి రవి మాట్లాడుతూ.. ఇప్పటికే 40 దేశాల నుంచి దాదాపు 520 మంది ఎన్నారై ప్రతినిధులు ప్రవాసీ దివస్‌లో పాల్గొనేందుకు రిజిస్టర్ చేసుకున్నారని తెలిపారు. న్యూఢిల్లీలో జనవరి 7వ తేదీ నుంచి 9వ తేదీ వరకు జరుగనున్న ఈ సమావేశాలను 8వ తేదీన ప్రధానమంత్రి డాక్టర్ మన్మోహన్ సింగ్ అధికారికంగా ప్రారంభిస్తారని మంత్రి వివరించారు.
అంతకుముందు రోజున నానో టెక్నాలజీ, ఎన్నారై ఆస్తుల అంశాలపై సదస్సులు జరుగుతాయని మంత్రి వాయలార్ రవి చెప్పారు. జనవరి 7 సాయంత్రం ప్రధాని ఆధ్వర్యంలో అంతర్జాతీయ సలహా సంఘం సమావేశం జరుగుతుందన్నారు. అమర్త్యసేన్, జగదీష్ భగవతి, లక్ష్మీనివాస్ మిట్టల్, పెప్సికో ఛైర్మన్ ఇంద్రానూయి, విక్రమ్ పండిట్, శ్యామ్ పిట్రోడా, రజత్ గుప్తాలతో సహా 20 మంది ఈ కమిటీలో సభ్యులుగా ఉండటం గమనార్హం.