ప్రపంచంలోని అత్యుత్తమ విశ్వవిద్యాలయాల జాబితాలో ఏ ఒక్క భారతీయ విశ్వవిద్యాలయానికీ చోటు దక్కలేదు. అమెరికా, బ్రిటన్ విశ్వవిద్యాలయాలే వీటిలో ఎక్కువగా స్థానం సంపాదించాయి. క్యూస్‌/టైమ్స్ హైయ్యర్ ఎడ్యుకేషన్ వారు ఇచ్చిన ఈ ర్యాకింగ్స్‌లో.. అమెరికాలోని హార్వార్డ్ విశ్వవిద్యాలయం 2009 సంవత్సరానికికూడా తన అగ్రస్థానాన్ని పదిలం చేసుకుంది.
యేల్ విశ్వ విద్యాలయం మాత్రం ద్వితీయ స్థానం నుంచి తృతీయ స్థానానికి దిగజారగా.. బ్రిటన్‌కు చెందిన కేంబ్రిడ్జి యూనివర్సిటీ తృతీయ స్థానం నుంచి ద్వితీయ స్థానానికి ఎగబాకడం విశేషంగా చెప్పవచ్చు.
అలాగే యూనివర్సిటీ కాలేజ్ ఆఫ్ లండన్ ఒక్కసారిగా తన స్థానాన్ని మెరుగుపరచుకుని ఆక్స్‌ఫర్డ్ వర్సిటీల సరసన నిలవటమేగాక.. దాంతోపాటు ఐదో స్థానాన్ని పంచుకుంది. కాగా ఈ టాప్ 100 జాబితాలో ఆసియా విశ్వవిద్యాలయాల సంఖ్య 14 నుంచి 16కు పెరిగింది. టోక్యో వర్సిటీ 22వ స్థానంలోనూ, హాంకాంగ్ వర్సిటీ 24వ స్థానంలో నిలిచాయి.
ఇదిలా ఉంటే.. జపాన్, దక్షిణ కొరియా, హాంకాంగ్లలోని విశ్వవిద్యాలయాలు వడివడిగా పాశ్చాత్య వర్సిటీలను అందుకుంటున్నాయని బ్రిటన్ వర్సిటీల ప్రముఖులు వ్యాఖ్యానిస్తున్నారు. ఇకపోతే బ్రిటన్‌లోని పరిశోధక విశ్వవిద్యాలయాలకు అంతర్జాతీయంగా మంచి పేరును సంపాదించుకున్నాయని ఈ సర్వే ద్వారా వెల్లడైనట్లు తెలుస్తోంది.
ఇక మొదటి పది స్థానాలలో నిలిచిన వర్సిటీల వివరాల్లోకి వస్తే.. హార్వార్డ్, కేంబ్రిడ్జ్, యేల్, యూసీఎల్, లండన్, ఇంపీరియల్ కాలేజ్ లండన్, ఆక్స్‌ఫర్డ్, చికాగో, ప్రిన్సిటన్, ఐమ్ఐచీ, మసాచుసెట్స్, కాలిఫోర్నియా ఇనిస్టిట్యూట్ ఆఫ్ టెక్నాలజీ.. తదితర వర్సిటీలు నిలిచాయి.