పెళ్లిపందిట్లోనే భర్తకు బడితపూజ చేసిన భార్య... లుథియానాలో ఘటన

రెండో పెళ్లి చేసుకునేందుకు యత్నించిన భర్తను పెళ్లి పందింట్లోనే భార్య బడితపూజ చేసింది. ఈ సంఘటన పంజాబ్ రాష్ట్రంలోని లుథియానాలో జరిగింది. తాజాగా వెలుగులోకి వచ్చిన ఈ వివరాలను పరిశీలిస్తే లుథియానాలో ఓ కళ్య

రెండో పెళ్లి చేసుకునేందుకు యత్నించిన భర్తను పెళ్లి పందింట్లోనే భార్య బడితపూజ చేసింది. ఈ సంఘటన పంజాబ్ రాష్ట్రంలోని లుథియానాలో జరిగింది. తాజాగా వెలుగులోకి వచ్చిన ఈ వివరాలను పరిశీలిస్తే లుథియానాలో ఓ కళ్యాణ మండపంలో వివాహం జరగడానికి అన్ని ఏర్పాట్లూ పూర్తి చేశారు. వరుడు, వధువు తరపు బంధువులంతా వేడుక వేదిక వద్దకు చేరుకున్నారు. ఇంతలో ఆ కళ్యాణ మండపం వద్దకు ఓ మహిళ కారులో నలుగురు బంధువులతో కలిసి వచ్చింది. 

నేరుగా వరుడెక్కడ? అని ఆడపెళ్లివారిని ప్రశ్నించింది. మేడ మీదున్నాడనడంతో అక్కడికి చేరుకుని, ఎవర్ని మోసం చేస్తావంటూ అందరి ముందూ లెంపలు వాయించింది. కాలర్ పట్టి నిలదీసింది. ఈ హఠాత్పరిణామంతో మేల్కొన్న వరుడి బంధువులు ఆమెను అడ్డుకునేందుకు ప్రయత్నించారు. వారిపై కూడా చేయి చేసుకుంది. 

ఇంతలో మరికొందరు అసలేం జరుగుతోందని ప్రశ్నించడంతో తాను అతని మొదటి భార్యనని చెప్పింది. దీంతో అంతా షాక్ తిన్నారు. అందరి ముందు భర్తను కొడుతూ కాలర్ పట్టుకుని ఆమె ఈడ్చుకొచ్చింది. ఇంతలో పోలీసులు రావడంతో తాను ఆమెతో విడాకులు తీసుకున్నానని, అందుకు సంబంధించిన పత్రాలు తన వద్ద ఉన్నాయని వరుడు చెబుతున్నా, ఆమె అతనిపై కలబడి చితక్కొట్టడం విశేషం.