ప్రేముంటే సూసైడ్ చేసుకుందాం రా... నిరాకరించిన యువతి గొంతు కోసిన ప్రియుడు

నిజంగా నామీద ప్రేమ వుంటే ఇద్దరం కలిసి ఆత్మహత్య చేసుకుందాం రా అంటూ ప్రియురాలిని ప్రియుడు పిలిచాడు. దీనికి ఆ యువతి నిరాకరించింది. దీంతో ఆగ్రహించిన ప్రియుడు.. ప్రియురాలిని అత్యంత పాశవికంగా గొంతుకోశాడు. ఈ  దారుణం ఉత్తరప్రదేశ్ రాష్ట్రంలోని ఆగ్రా జిల్లా ఖాకేగఢ్ గ్రామంలో జరిగింది. 

తాజాగా వెలుగులోకి వచ్చిన ఈ వివరాలను పరిశీలిస్తే, మధ్యప్రదేశ్‌ రాష్ట్రం మోరినా జిల్లాలోని చిచ్చవాలి గ్రామానికి చెందిన హేత్‌ సింగ్‌ తోమర్ ‌(21) అనే యువకుడు అదే యూపీలోని ఖాకేగడ్‌ గ్రామానికి చెందిన 19 ఏళ్ల యువతిని ప్రేమిస్తూ వచ్చాడు. ఆమెతో మాట్లాడేందుకు ఓ మొబైల్ ఫోన్ కూడా కొనిచ్చాడు. 

ఈ క్రమంలో నవంబరు 30వ తేదీన తనను కలవాలని యువతిని సింగ్‌ ఆదేశించాడు. ఆ సమయంలో మరో అబ్బాయితో యువతి కనిపించింది. దీంతో తీవ్ర ఆగ్రహావేశాలకు లోనైన సింగ్‌.. యువతికి ఫోన్‌ చేసి నిర్మానుష్య ప్రాంతానికి పిలిపించాడు. తన మీద నిజమైన ప్రేమ ఉంటే.. ఇద్దరం కలిసి ఆత్మహత్య చేసుకుందాం అని యువతికి సింగ్‌ చెప్పాడు.

అందుకు ఆ యువతి అంగీకరించలేదు. దీంతో ఆగ్రహించిన తోమర్.. ఆమె గొంతు కోసి చంపేశాడు. ఆ తర్వాత యువతి మృతదేహాన్ని అక్కడే పడేసి.. ఆగ్రా నుంచి మోరినాకు వెళ్లాడు. రెండు రోజుల తర్వాత తోమర్‌ సింగ్‌ పురుగుల మందు తాగి ఖీరాఘర్‌ పోలీసు స్టేషన్‌కు వెళ్లాడు. 

ఆ యువతిని తానే చంపానని చెప్పేందుకు సింగ్‌ పోలీసుల వద్దకు వెళ్లాడు. కానీ అతడిని పోలీసు స్టేషన్‌ నుంచి ఆస్పత్రికి తరలిస్తున్న క్రమంలోనే సింగ్‌ ప్రాణాలు విడిచాడు. దీనిపై పోలీసులు కేసు నమోదు చేసి విచారణ జరుపుతున్నారు.