హర్యానా రాష్ట్రంలోని హిసార్‌ జిల్లాలో శుక్రవారం ఉదయం ఘోర ప్రమాదం జరిగింది. 40 మందికిపై పాఠశాల విద్యార్థులతో వెళుతున్న ఓ స్కూల్ బస్సు బ్రేకులు ఫెయిల్ అయ్యాయి. దీంతో ఆ వాహనం అదుపు తప్పి, ముందు వెళుతున్న అనేక వాహనాలను ఢీకొట్టింది. చివరకు ఓ భారీ ట్రక్కును ఢీకొట్టి నిలిచిపోయింది. భారీ వర్షాల నేపథ్యంలో 9వ జాతీయ రహదారిపై ఈ వ్యాను వెళుతుండగా ఈ ప్రమాదం జరిగింది.
బ్రేకులు ఫెయిల్ కావడంతో వాహనాన్ని డ్రైవర్ నియంత్రించలేక పోయాడు. ఫలితంగా అనేక వాహనాలను ఢీకొట్టాడు. ఈ ప్రమాదంలో గాయపడిన వారిని సమీపంలోని ఆస్పత్రులకు తరలించి చికిత్స అందిస్తున్నారు. అలాగే, ఈ ఘటనలో తీవ్రంగా గాయపడిన ఓ ద్విచక్రవాహనదారుడి పరిస్థితి విషమంగా ఉంది.
స్కూలు బస్సు, ఈ కారును కూడా ఢీకొట్టింది. దీంతో ఆ కారు వెళ్లి ఓ భారీ ట్రక్కును ఢీకొట్టింది. అయితే, ట్రక్కు అప్పటికే నెమ్మదిగా వెళుతుండగా కారులోని ఇద్దరు మహిళలు సులువుగా బయటకు రాగలిగారు. అదృష్టవశాత్తు ఈ ప్రమాదంలో పాఠశాల చిన్నారులకు ఎవరికీ గాయాలు కాలేదు. కాగా, ప్రమాదంపై స్థానిక పోలీసులు కేసు నమోదు చేసి విచారణ జరుపుతున్నారు.