దేశ వాణిజ్య రాజధాని ముంబై రహదారులపై ఇద్దరు అమ్మాయిలను ఎక్కించుకుని సాహసం చేసిన ఓ యువకుడిని పోలీసులు గుర్తించి అరెస్టు చేశారు. ముంబై బంద్ర కుర్ల కాంప్లెక్స్ పోలీస్ స్టేషన్ పరిధిలో ఒక యువకుడు తన బైకుపై ముందు ఒక యువతి, వెనుక ఒక యువతిని కూర్చోబెట్టుకుని ముందు టైర్‌ను గాల్లోకి లేపి బైకును వేగంగా డ్రైవ్ చేసిన వీడియో ఒకటి సోషల్ మీడియాలో వైరల్ అయింది. ఈ వీడియోను 1.80 లక్షల మంది చూశారు. ఇలాంటి సాహసం చేసిన బైక్ రైడర్, అతనితో ఉన్న ఇద్దరు యువతులకు మాత్రమే కాకుండా, ఇతర వాహనదారులకు కూడా అత్యంత ప్రమాదకరం కావడంతో పోలీసులు దీన్ని అత్యంత తీవ్రమైన నేరంగా పరిగణించారు. సదరు వాహనదారుడిని గుర్తించారు. అతని పేరు ఫయాజ్ ఖాద్రీగా గుర్తించిన పోలీసులు అదుపులోకి తీసుకున్నారు. కేసు నమోదు చేసి జైలుకు తరలించారు.
ఈ వీడియో వైరల్ కావడంతో ముంబై ట్రాఫిక్ పోలీసులు ఓ ట్వీట్ చేశారు. బంద్ర కుర్ల కాంప్లెక్స్ పోలీస్ స్టేషన్‌లో కేసు నోదైంది. విచారణ మొదలైంది. నిందితుడిని గురించి సమాచారం తెలిస్తే షేర్ చేయండి అంటూ ట్వీట్ చేశారు. చట్ట ప్రకారం బహిరంగ ప్రదేశాల్లో మోటార్ బైకుపే విన్యాసాలు చేయకూడదు. అది కూడా హెల్మెట్ లేకుండా, ఒకే బైకుపై ముగ్గురు కలిసి ఈతరహా ప్రమాదకర ఫీట్లు చేయడం వారితోపాటు ఆ మార్గంలో ప్రయాణించే ఇతర వాహనదారులకు కూడా ప్రమాదకరం. అందుకే దీన్ని తీవ్రంగా పరిగణిస్తున్నట్టు పేర్కొన్నారు.