పొట్టలో రూ.10 కోట్ల డ్రగ్స్ : థ్రిల్లింగ్ క్రైమ్

చాలా మంది నేరస్తులకు సినిమాల్లో చూపించే కొన్ని సీన్లే ప్రేరణగా నిలుస్తాయి. ఆ సీన్లను ఆదర్శంగా తీసుకునే కొందరు నేరగాళ్ళు పక్కాగా అమలు చేస్తుంటారు. తాజాగా హీరో సూర్య నటించిన ఓ సినిమా వీడొక్కడే లో తరహాలోనే పొట్టలో పది కోట్ల రూపాయల విలువ చేసే డ్రగ్స్‌ను అక్రమంగా తరలించేందుకు ప్రయత్నించి పట్టుబడ్డారు. 

ముంబై అంతర్జాతీయ విమానాశ్రయంలో తూర్పు ఆఫ్రికాలోని మొజాంబిక్‌ దేశానికి చెందిన ఓ వ్యక్తి మంగళవారం పట్టుబడ్డాడు. అతని వద్ద నుంచి రూ.10 కోట్ల విలువ చేసే 1.02 కేజీల కొకైన్‌‌ను అధికారులు స్వాధీనం చేసుకున్నారు. అనంతరం నిందితుడు ఫ్యూమో ఇమాన్యుయేల్‌ జెడెక్వియాస్‌‌ను అదుపులోకి తీసుకున్నట్లు కస్టమ్స్ అధికారులు తెలిపారు.

కేజీకి పైగా ఉన్న కొకైన్ పదార్థాలను క్యాప్సూల్స్‌ రూపంలో పొట్టలో దాచుకొని వస్తుండగా.. అనుమానం వచ్చి తనిఖీలు చేపట్టినట్లు అధికారులు తెలిపారు. కొకైన్‌తో నింపిన 70 క్యాప్సూళ్లను నిందితుడు మింగినట్లు అధికారులు తెలిపారు. నిందితుడిని బైకుల్లాలోని జేజే ఆసుపత్రికి తరలించి.. కొకైన్‌ క్యాప్సూళ్లను వెలికితీసినట్లు అధికారులు తెలిపారు.