చైనా అధ్యక్షుడి పేరు.. డీడీ యాంకర్ ఉద్యోగాన్ని ఊడగొట్టింది.. అంటే నమ్ముతారా.. నమ్మితీరాల్సిందే. ప్రస్తుతం భారత పర్యటనలో ఉన్న చైనా అధ్యక్షుడి పేరు, దూరదర్శన్ యాంకర్ ఉద్యోగాన్ని ఊడగొట్టిందని.. సాక్షాత్తు ప్రసార భారతి చీఫ్ జవహర్ సర్కార్ చెప్పారు.
అసలు విషయమేంటంటే..., చైనా అధ్యక్షుడు ఝీ జిన్ పింగ్‌లో తొలి ‘ఝీ’ని ఆంగ్లంలో ‘‘ఎక్స్, ఐ’’ అనే రెండు అక్షరాల సమాహారంగా రాస్తామని మనకు తెలిసిందే. ఇక, రోమన్ అంకెల్లోని '11' కూడా ఈ రెండు అక్షరాల మాదిరిగానే ఉంటుంది.
మరి, దూరదర్శన్ న్యూస్ యాంకర్‌కు, ఈ రెండింటిపై అవగాహన ఉందో, లేక రోమన్ అంకె మాత్రమే గుర్తుందో తెలియదు కాని, చైనా అధ్యక్షుడి పేరును ‘‘ఎలెవెన్ జిన్ పింగ్’’గా ఉచ్చరించేశారు. వార్తలు ముగిసేలోగా సదరు యాంకర్ చేతిలో ఉద్వాసన ఉత్తర్వులు ప్రత్యక్షమయ్యాయి.
ప్రభుత్వ ఆధ్వర్యంలో నడుస్తున్న ఛానెల్‌లో పనిచేస్తున్న యాంకర్‌కు ఆమాత్రం తెలియకపోతే ఎలా? అన్న రీతిలో ‘‘ఆ యాంకర్ ను తొలగించేశాం’’అంటూ ప్రసార భారతి చీఫ్ జవహర్ సర్కార్ ఆవేశంగా ప్రకటించారు.