యమునా నది. ఈ పేరు చెప్పగానే పురాణకాలంలోని రాధాకృష్ణులు గుర్తుకు వస్తారు. యమునా నదిలో వారి జలకాలాటలు గుర్తుకు వస్తాయి. ఐతే అలాంటి యమునా నది ఇప్పుడు మురికి కూపంగా మారిపోయింది. ఈ నదిని శుద్ధి చేస్తామంటూ ఎన్నో ఏళ్లుగా ఎంతోమంది రాజకీయ నాయకులు చెబుతూనే వున్నారు. కానీ ఇప్పటివరకూ పురోగతి లేదు. ఈ నేపధ్యంలో ఆగ్రహించిన నాయకుడు యమునా నదిలో మునకలు వేసి ఆస్పత్రి పాలయ్యారు.
పూర్తి వివరాలు చూస్తే... ఢిల్లీ భారతీయ జనతా పార్టీ అధ్యక్షుడు వీరేంద్ర సచ్‌దేవా యమునా నదిలో అత్యంత కలుషితమైన విష నీటిలో స్నానం చేసిన కొన్ని రోజుల తర్వాత శ్వాస సమస్యలు, చర్మ సమస్యలు ఎదుర్కొంటున్నారు. చర్మంపై దద్దుర్లు రావడంతో బీజేపీ నేత ఆస్పత్రిలో చేరినట్లు ఆ పార్టీ సోషల్ మీడియా హ్యాండిల్ పేర్కొంది.
ఆరోగ్య సమస్యలను ఎదుర్కొన్న తర్వాత, భారతీయ జనతా పార్టీ ఢిల్లీ మాజీ ముఖ్యమంత్రి అరవింద్ కేజ్రీవాల్ 2025 నాటికి యమునా నదిని శుద్ధి చేస్తానని తన వాగ్దానాన్ని నెరవేర్చడంలో విఫలమయ్యారని ఆయన వెల్లడించారు. యమునా నదిలో మునకలు వేసిన తర్వాత వీరేంద్ర సచ్‌దేవా చర్మంపై దద్దుర్లు, శ్వాస తీసుకోవడంలో స్వల్ప అసౌకర్యాన్ని ఎదుర్కొన్నారని ఢిల్లీ బీజేపీ ఒక ప్రకటనలో తెలిపింది. ఆర్‌ఎంఎల్‌ ఆస్పత్రిలో వైద్యులు పరీక్షించి మూడు రోజుల పాటు మందులు రాశారు.
వీరేంద్ర సచ్‌దేవా వాదన తర్వాత, ఆప్ సీనియర్ నాయకుడు, పర్యావరణ మంత్రి గోపాల్ రాయ్ ప్రతిపక్షాలపై ఎదురుదాడికి దిగారు. బిజెపి నాయకులు యమునా నదిలో డ్రామాలు ప్రారంభించారని మండిపడ్డారు.