వేద నిలయానికి ఐదుగురు కానిస్టేబుళ్ళతో భద్రత... చిన్నబోయిన శశికళ!

దివంగత ముఖ్యమంత్రి జయలలిత జీవించివున్న సమయంలో షాడో సీఎంగా ఉన్న మహిళ శశికళ. తెరవెనుక చక్రం తిప్పుతూ వచ్చారు. కానీ, జయలలిత మరణం తర్వాత పరిస్థితులు పూర్తిగా మారిపోయాయి. జయలలిత నివాస ప్రాంతమైన పోయస్ గార్డ

దివంగత ముఖ్యమంత్రి జయలలిత జీవించివున్న సమయంలో షాడో సీఎంగా ఉన్న మహిళ శశికళ. తెరవెనుక చక్రం తిప్పుతూ వచ్చారు. కానీ, జయలలిత మరణం తర్వాత పరిస్థితులు పూర్తిగా మారిపోయాయి. జయలలిత నివాస ప్రాంతమైన పోయస్ గార్డెన్‌లోని భద్రతను పూర్తిగా తొలగించారు. ఇపుడు కేవలం ఐదుగురు కానిస్టేబుళ్లు మాత్రమే భద్రతగా ఉన్నారు. వాస్తవానికి గత పదేళ్లుగా ఇక్కడ పదుల సంఖ్యలో కానిస్టేబుళ్లు, స్పెషల్ ప్రొటెక్షన్ ఫోర్స్ (ఎస్.పి.జి) కమాండోలు భద్రతా ఉండేవారు. 

కానీ, జయలలిత మరణం తరువాత తమిళనాడులో రాజకీయాలు శరవేగంగా మారిపోతున్నాయి. అధికారాన్ని దక్కించుకోవాలని జయ నెచ్చెలి శశికళ ప్రయత్నాలను ముఖ్యమంత్రి పన్నీర్ సెల్వం ఎక్కడికక్కడ విజయవంతంగా అడ్డుకుంటున్నారు. ఆమె వర్గంలోని వారికి ఒక్కొక్కరికి చెక్ పెట్టుకుంటూ వస్తున్నారు. ఈ నేపథ్యంలో శశికళకు హై సెక్యూరిటీని తొలగిస్తూ ఉత్తర్వులు జారీ అయ్యాయి. జయలలిత బతికున్నప్పటి నుంచి ఆమెతో పాటు శశికళకూ అత్యున్నత స్థాయి పోలీసు భద్రతను కల్పిస్తూ వచ్చిన సంగతి తెలిసిందే. 

సోమవారం వరకూ ఈ భద్రత కొనసాగగా, దీన్ని తొలగిస్తూ ఉత్తర్వులు జారీ కాగానే, పోయిస్ గార్డెన్స్‌లోని వేదనిలయం నుంచి 80 శాతం భద్రతా సిబ్బంది వెళ్లిపోయారు. ప్రస్తుతం ఐదుగురు కానిస్టేబుళ్లతో మాత్రమే సెక్యూరిటీ కొనసాగుతోంది. దీంతో శశికళ ప్రైవేట్ సెక్యూరిటీని భద్రతగా నియమించుకున్నారు. ఇక శశికళను సందర్శిస్తున్న నేతల సంఖ్య కూడా క్రమంగా తగ్గిపోతోంది. నిన్నమొన్నటి వరకూ పార్టీకి చిన్నమ్మే దిక్కని మోకరిల్లిన మంత్రులు, ఎమ్మెల్యేలు ఇప్పుడు అటువైపు కన్నెత్తి కూడా చూడటం లేదు. జరుగుతున్న పరిణామాలు శశికళ ఆధిపత్యానికి చెక్ చెప్పనున్నాయని తెలుస్తోంది.