తమిళనాడులో మరో ఘోర ప్రమాదం జరిగింది. బాణసంచా తయారీ కర్మాగారంలో పేలుడు సంభవించటంతో 12 మంది సజీవదహనమయ్యారు. ఈ సంఘటన విరుద్‌నగర్‌ జిల్లాలో శుక్రవారం జరిగింది.
విరుద్‌నగర్‌ జిల్లా అచన్‌కులమ్‌లోని బాణసంచా తయారీ కర్మాగారంలో పేలుడు సంభవించింది. దీంతో అక్కడ ఉన్న నాలుగు షెడ్లకు మంటలు వ్యాపించాయి. సమాచారం అందుకున్న ఫైర్‌ సిబ్బంది అక్కడికి చేరుకున్నారు.
ఈ మంటలు అదుపుచేయటానికి దాదాపు 30 మంది అగ్నిమాపక సిబ్బంది తీవ్రంగా శ్రమించాల్సి వచ్చింది. ఈ ప్రమాదంలో 12 మంది మృత్యువాతపడగా.. 20 మందికి పైగా తీవ్ర గాయాలతో ఆసుపత్రి పాలయ్యారు. సంఘటనపై కేసు నమోదు చేసుకున్న పోలీసులు దర్యాప్తు ప్రారంభించారు.
మరోవైపు, ఈ ప్రమాద ఘటనపై ప్రధాని నరేంద్ర మోడీతో పాటు.. రాష్ట్ర గవర్నర్ పురోహిత్, ముఖ్యమంత్రి ఎడప్పాడి పళనిస్వామిలు సంతాపాన్ని వెలుబుచ్చారు. అలాగే, మృతుల కుటుంబాలకు తమిళనాడు ప్రభుత్వం రూ.3 లక్షలు, ప్రధాని మోడీ రూ.2 లక్షలు చొప్పున ఆర్థిక సాయం ప్రకటించారు.