ఒరిస్సా రాష్ట్రంలో ఘోరం జరిగింది. వంతెనపై నుంచి ఓ బస్సు ప్రమాదవశాత్తు కిందపడింది. ఈ ఘటనపై ఐదుగురు ప్రాణాలు కోల్పోయారు. ఒరిస్సా రాష్ట్రంలోని జాజ్‌పూర్ జిల్లాలో ఈ ఘోర ప్రమాదం జరిగింది. బస్సు వంతెనపై నుంచి పడటంతో ఐదుగురు ప్రాణాలు కోల్పోయారు. మరో 35 మంది గాయపడ్డారు. ఈ ప్రమాద ఘటనపై సమాచారం అందుకున్న వెంటనే పోలీసులు హుటాహుటిన ఘటనా స్థలానికి చేరుకుని సహాయక చర్యలు చేపట్టారు. అయితే, బస్సుపై డ్రైవర్ నియంత్రణ కోల్పోవడం వల్లే ఈ ప్రమాదం జరిగినట్టు పోలీసులు వెల్లడించారు.
ఈ ప్రమాద వివరాలను పరిశీలిస్తే, మొత్తం 47మంది ప్రయాణికులతో పూరీ నుంచి బంగాల్కు సోమవారం మధ్యాహ్నం బస్సు బయలుదేరింది. రాత్రి 9 గంటల సమయంలో జాజ్‌పుర్లోని 16వ జాతీయ రహదారిపై బస్సు ప్రయాణిస్తున్న క్రమంలో బారాబతి వద్ద ఫ్లైఓవర్ దాటుతుండగా బస్సుపై డ్రైవర్ నియంత్రణ కోల్పోయాడు. దీంతో ఫ్లైఓవర్ పైనుంచి బస్సు రోడ్డుపై పడిపోయింది. ఈ ప్రమాదంలో ఒక మహిళ సహా ఐదుగురు వ్యక్తులు మృతి చెందారు. గాయపడిన వారి వెంటనే కటక్లోని ఆస్పత్రికి తరలించారు. ఈ ఘటనపై ఒడిశా ముఖ్యమంత్రి నవీన్ పట్నాయక్ దిగ్బ్రాంతి వ్యక్తం చేశారు. మృతుల కుటుంబాలకు రూ.3లక్షలు ఆర్థిక సాయం ప్రకటించారు.
ఈ ఘటనలో గాయపడిన వారికి మెరుగైన చికిత్స కోసం వైద్యుల బృందాన్ని ఏర్పాటు చేసినట్లు రవాణా కమిషనర్ అమితవ్ ఠాకూర్ తెలిపారు. 'ఈ ప్రమాదంలో గాయపడిన వారిని 16 అంబులెన్స్ల సాయంతో కటక్ ఆస్పత్రికి తరలించాం. గ్యాస్ కట్టర్లను ఉపయోగించి బస్సు కిటికీలు కత్తిరించి ప్రయాణికులను రక్షించాం. అనంతరం బస్సును క్రేన్ సహాయంతో పైకి తీశాం. ప్రయాణికుల్లో ఎక్కువ మంది బంగాల్కు చెందినవారే ఉన్నారు' అని అమితవ్ పేర్కొన్నారు.