అరుణాచల్‌ప్రదేశ్ ముఖ్యమంత్రి ధోర్జీ ఖండూ హెలికాప్టర్ ఆచూకీ ఎంతకీ తెలియరావడం లేదు. ఇస్రో ఉపగ్రహాలు సైతం మాయమైన హెలికాఫ్టర్ ఆచూకీ ఆనవాళ్ళను పసిగట్టలేక పోతున్నాయ్. మరోవైపు సుఖోయ్ యుద్ధ విమానాలు అణువణువూ గాలిస్తూ.. ఖండూ హెలికాఫ్టర్ కోసం విశ్వప్రయత్నాలు సాగుతున్నాయి.
ఈ హెలికాఫ్టర్ కోసం మూడో రోజూ ముమ్మర గాలింపులు జరుగుతున్నాయి. ఆకాశం మేఘావృతం కావడంతో ఏరియల్ సర్వేపై పెట్టుకున్న ఆశలు నీరుగారాయి. సోమవారం తెల్లవారుజామున బలగాలు మళ్లీ రంగంలోకి దిగాయి. ఖండూ సహా ఐదుగురు ప్రయాణిస్తున్న పవన్ హన్స్ హెలికాప్టర్ ఏఎస్-బీ 350 యూరోకాప్టర్ బీ-3 శనివారం నుంచి కనిపించకుండాప పోయిన విషయం తెల్సిందే.
తవాంగ్ నుంచి ఇటానగర్‌కు బయలుదేరిన బీ-3 టేకాఫ్ తీసుకున్న 20 నిమిషాల తర్వాత హెలికాఫ్టర్ అదృశ్యమైంది. దీన్ని గుర్తించేందుకు ఆదివారం వాయుసేనకు చెందిన రెండు సుఖోయ్ యుద్ధవిమానాలు, ఒక ఎంఐ-17 విమానం, ఆరు హెలికాప్టర్లు గగనతలం నుంచి అరుణాచల్, భూటాన్ సరిహద్దు భూతలాన్ని జల్లెడ పట్టాయి. తవాంగ్, ఇటానగర్ మార్గాన్ని అణువణువునా శోధించాయి. ఆర్మీ, ఎస్‌ఎస్‌బీ, ఐటీబీపీ పదాతి దళాలకు చెందిన 2,400 మంది జవాన్లు కూడా అన్వేషణలో పాల్గొన్నారు.