బ్రహ్మ కడిగిన పాదము...!

బ్రహ్మ గడిగిన పాదము
బ్రహ్మము తానె నీ పాదము "బ్రహ్మ"

చెలగి వసుధ గొలిచిన దీ పాదము
బలి తల మోపిన పాదము
తలకక గగనము తన్నిన పాదము
బలరిపు గాచిన పాదము "బ్రహ్మ"

కామిని పాపము కడిగిన పాదము
పాము తల నిడిన పాదము
ప్రేమపు శ్రీసతి పిసికెడి పాదము
పామిడి తురగపు పాదము "బ్రహ్మ"

పరమ యోగులకు పరిపరి విధముల
వర మొసగెడి నీ పాదము
తిరు వేంకటగిరి తిరమని చూపిన
పరమ పదము నీ పాదము "బ్రహ్మ"