యూట్యూబ్‌లో కీలక మార్పులు.. వ్యూస్‌ను అలా పెంచుకుంటున్నారట..

యూట్యూబ్‌లో కీలక మార్పులు ప్రకటించింది. వీడియోలను చూస్తున్న వారి సంఖ్య అంటే వ్యూస్‌ను కృత్రిమ పద్ధతుల ద్వారా పెంచుతున్నారని గమనించిన యూట్యూబ్.. పలు కీలక మార్పులు ప్రకటించింది. ఈ క్రమంలో ఈ ఏడాది జూలైలో ఓ భారతీయ ర్యాప్‌ సింగర్‌ వీడియో, కేవలం ఒక్క రోజులోనే యూట్యూబ్ లో 7.5 కోట్ల వ్యూస్‌ సాధించింది. 

అయితే, ఈ సంఖ్యను మ్యానిపులేట్ చేశారని, తప్పుడు మార్గాల్లో పెంచారని ఆరోపణలు వచ్చాయి. ఇకపై ఇలాంటి పద్ధతులతో రేటింగ్, వ్యూస్ పెంచుకునే వారికి అడ్డుకట్ట వేసేలా యూట్యూబ్ రంగం సిద్ధం చేసుకుంది. ఇకపై వీడియోల్లోని ప్రకటనలను ఎంతమంది చూశారన్న విషయంపై ఆధారపడకుండా, ఇతర పద్ధతుల ఆధారంగా ఎంతమంది చూశారన్న లెక్కను గణించనున్నామని యూట్యూబ్ కంపెనీ ఓ బ్లాగ్ పోస్టులో పేర్కొంది. 

24 గంటల్లో రికార్డు వ్యూస్‌ అన్న అంశంపైనా మార్పులు చేయనున్నామని, డైరెక్ట్‌‌‍‌గా షేర్ చేసుకునే లింక్‌‌లు, సెర్చ్‌చేసి వీడియోలు చూస్తుండటం వంటి సహజ సిద్దమైన ప్రక్రియల ఆధారంగా ఎంతమంది చూశారన్న విషయాన్ని తేలుస్తామని యూట్యూబ్ వెల్లడించింది.