ప్రముఖ టెక్ దిగ్గజం ఇన్ఫోసిస్ విశాఖపట్టణంలో కొత్త క్యాంపస్‌ను ఏర్పాటుచేసే దిశగా అడుగులు వేస్తుంది. ఇందుకోసం అక్కడ పెట్టుబడులు పెట్టాలని భావిస్తుంది. ముఖ్యంగా, తమ వద్ద పని చేస్తున్న ఉద్యోగులు, కొత్తగా నియమించుకుంటున్న ఉద్యోగుల్లో అత్యధిక శాతం మంది టైర్-2 సిటీల నుంచి వస్తున్నారని, అందుకే అలాంటి క్యాంపస్‌లు ఏర్పాటు చేయాలని భావిస్తుంది. ఇందుకోసం ఏపీలో మొత్తం నాలుగు టైర్-2 నగరాలను ఎంపిక చేసింది.
ఇందులోభాగంగా, వెయ్యి మంది ఉద్యోగులతో తొలి క్యాంపస్ పెట్టే అవకాశం ఉంది. అయితే, ఈ విషయంలో ప్రభుత్వం ప్రమేయమే లేదు. పైగా, మంత్రి గుడివాడ అమర్నాథ్‌కు అసలు విషయమే తెలియదు. ఇన్ఫోసిస్ సొంతంగా ప్రభుత్వంతో ఎలాంటి సంబంధం లేకుండానే ఈ క్యాంపస్‌లను నెలకొల్పనుంది. మేమే వెళ్లాం.. మేమే తీసుకొచ్చాం అనే ప్రచారానికి తావులేకుండా, రాజకీయ నేతల ప్రమేయం అస్సలు లేకుండా ఈ క్యాంపస్‌లను ఏర్పాటు చేయాలని ఇన్ఫోసిస్ భావిస్తుంది.
అయితే, ప్రభుత్వాన్ని సంప్రదించకుండా, ప్రభుత్వ పెద్దలకు తెలియకుండా ఈ క్యాంపస్‌ను స్థాపించడం సాధ్యమేనా అనే చర్చ కూడా సాగుతోంది. పైగా, ప్రభుత్వం పెద్దలు ఈగోలకు వెళితే మాత్రం ఇన్ఫోసిస్ తన నిర్ణయం మార్చుకునే అవకాశం లేకపోలేదని టెక్ నిపుణులు అభిప్రాయపడుతున్నారు.
