ఐపీఎల్ ఫీవర్: ఎనిమిది జట్ల బలం-బలహీనత ఏంటో తెలుసుకుందాం..

ఇండియన్ ప్రీమియర్ లీగ్ ట్వంటీ-20 క్రికెట్ సిరీస్‌‍ పదో సీజన్‌లో భాగంగా తొలి మ్యాచ్‌కు హైదరాబాద్ వేదిక కానుంది. మే 21వ తేదీ వరకు జరిగే.. ఈ సిరీస్‌లో 8 జట్లు బరిలోకి దిగనున్నాయి. కోల్‌కతా నైట్ రైడర్స్ జ

ఇండియన్ ప్రీమియర్ లీగ్ ట్వంటీ-20 క్రికెట్ సిరీస్‌‍ పదో సీజన్‌లో భాగంగా తొలి మ్యాచ్‌కు హైదరాబాద్ వేదిక కానుంది. మే 21వ తేదీ వరకు జరిగే.. ఈ సిరీస్‌లో 8 జట్లు బరిలోకి దిగనున్నాయి. కోల్‌కతా నైట్ రైడర్స్ జట్టుకు గౌతం గంభీర్ నాయకత్వం వహిస్తున్నాడు. ఈ జట్టు టైటిల్ కోసం పాకులాడుతోంది. మెరుగైన ఆటతీరును ప్రదర్శించేందుకు.. రెడీ అవుతోంది. ఈ జట్టులో బ్రావో, యూసుఫ్ పఠాన్, మనీష్ పాండే, సూర్య కుమార్ యాదవ్, సునీల్ నరేన్, కుల్‌దీప్ వంటి మేటి క్రికెటర్లున్నారు. 

రాయల్ ఛాలెంజర్స్ బెంగళూరు:

తాత్కాలిక కెప్టెన్ వాట్సన్ నేతృత్వంలోని రాయల్ ఛాలెంజర్స్ బెంగళూరు జట్టుకు ఈ ఏడాది ఐపీఎల్ ఓ ఛాలెంజ్ కానుంది. కెప్టెన్ విరాట్ కోహ్లీ, రాహుల్, డివిలియర్స్ ఈ టోర్నీ నుంచి గాయాల పాలై.. ఐపీఎల్‌కు దూరమైన సంగతి తెలిసిందే. ఇదే జట్టుకు మైనస్. 

గుజరాత్ లయన్స్: 

సురేష్ రైనా నాయకత్వంలోని గుజరాత్ లయన్స్ గత ఐపీఎల్ పోటీల్లో మెరుగైన ఆటతీరును ప్రదర్శించింది. ఈ జట్టులో మెక్ కల్లమ్, అరోన్ పిచ్, దినేష్ కార్తీక్, జోసెఫ్ రాయ్ వంటి కుమ్మేసే బ్యాట్స్‌మెన్లు ఉన్నారు. అయితే ఆల్ రౌండర్లు జడేజా, బ్రావో రెండు వారాల పాటు ఆటకు దూరం కావడం ఈ జట్టుకు మైనస్. 

సన్ రైజర్స్ హైదరాబాద్ :

డిఫెండింగ్ ఛాంపియన్ అయిన సన్ రైజర్స్ హైదరాబాద్ ఐపీఎల్ ట్రోఫీని ఈ ఏడాది కూడా కైవసం చేసుకునేందుకు మల్లగుల్లాలు పడుతోంది. కెప్టెన్ వార్నర్, యువరాజ్ సింగ్, శిఖర్ ధావన్, దీపక్ షీడా, రషీద్ ఖాన్, ఆప్ఘనిస్థాన్ క్రికెటర్ మొహ్మద్, ప్రవీణ్ వంటి అత్యుత్తమ ఆటగాళ్లు ఈ జట్టులో స్థానం సంపాదించుకున్నారు. కానీ నెహ్రా గాయాల నుంచి కోలుకుని జట్టుకు చేరుకునేంత వరకు జట్టుకు కాస్త కష్టాలు తప్పవు. 

ముంబై ఇండియన్స్:  

రోహిత్ శర్మ నేతృత్వంలోని ముంబై ఇండియన్స్ జట్టు మెరుగైన ఆటతీరును ప్రదర్శించేందుకు రెడీ అవుతోంది. రోహిత్ శర్మ, జోస్ బట్లర్, పోలార్డ్, హార్దిక్ పాండ్య, సిమ్మన్స్, అంబటి రాయుడు వంటి అత్యుత్తమ క్రీడాకారులు ఈ జట్టులో ఉన్నారు. బౌలింగ్ విభాగంలో హర్భజన్ సింగ్, బుమ్రాలు జట్టుకు ప్లస్‌గా నిలుస్తారు. 

కింగ్స్ ఎలెవన్ పంజాబ్ : 

మాక్స్‌వెల్ నేతృత్వంలోని కింగ్స్ ఎలెవన్ పంజాబ్ జట్టు వృద్ధిమాన్ సాహా, మిల్లర్ వంటి ధీటుగా ఆడే క్రికెటర్లతో బరిలోకి దిగుతోంది. కానీ మురళీ విజయ్ గాయంతో మ్యాచ్‌లకు దూరం కావడం జట్టుకు మైనస్. 

ఢిల్లీ డేర్‌డెవిల్స్ : 

జహీర్ ఖాన్ నేతృత్వంలోని ఈ జట్టు తొలిసారిగా ఐపీఎల్ ట్రోఫీని సొంతం చేసుకోవాలని భావిస్తోంది. డుమిని, డికాక్ గాయాలతో తప్పుకున్నా.. అమిత్ మిశ్రా, ఆండర్సన్, కరుణ్ నాయర్, మాథ్యూస్ వంటి ఆటగాళ్లు ఈ జట్టుకు బలంగా ఉన్నారు. అయితే ఇప్పటికే జరిగిన తొమ్మిది ఐపీఎల్ సీజన్లలో ఆడిన ఢిల్లీ ఫైనల్‌కు చేరుకోలేదు. 

రైజింగ్ పూణే సూపర్ జెయింట్ : 

కెప్టెన్ పోస్టు నుంచి ధోనీని తప్పించి.. ఆ స్థానంలో ఆస్ట్రేలియా ఆటగాడు స్మిత్‌ను ఎంపిక చేశారు. రూ.14.5 కోట్ల మొత్తంతో వేలంలో కొనుగోలు చేసిన బెన్ స్టోకస్‌పై భారీ అంచనాలున్నాయి. రహానే డుప్లెసిస్ వంటి ఆటగాళ్లతో తప్పకుండా ఈ జట్టు తప్పకుండా మెరుగ్గా ఆడుతుందని క్రీడా పండితులు జోస్యం చెప్తున్నారు. తొలి మ్యాచ్‌లో బెంగళూరు రాయల్ ఛాలెంజర్స్- సన్ రైజర్స్ హైదరాబాద్ జట్లు నువ్వా నేను అని పోటీ పడనున్నాయి.