దున్నపోతును ఇంటర్వ్యూ చేశాను.. అది 'అంబా' అంటూ సమాధానమిచ్చింది.. పాక్ రిపోర్టర్

ఈ లోకంలో వింతలకు విడ్డూరాలకు కొదవే లేదు. అలాంటి వింత ఘటన ఒకటి పాకిస్థాన్‌లో చోటుచేసుకుంది. అదేంటంటే పాకిస్థాన్‌కు చెందిన ఓ ప్రముఖ టీవీఛానల్ రిపోర్టర్ ఓ దున్నపోతుని ఇంటర్వ్యూ చేశాడు. వినడానికే విడ్డూరం

ఈ లోకంలో వింతలకు విడ్డూరాలకు కొదవే లేదు. అలాంటి వింత ఘటన ఒకటి పాకిస్థాన్‌లో చోటుచేసుకుంది. అదేంటంటే పాకిస్థాన్‌కు చెందిన ఓ ప్రముఖ టీవీఛానల్ రిపోర్టర్ ఓ దున్నపోతుని ఇంటర్వ్యూ చేశాడు. వినడానికే విడ్డూరంగా అనిపించినా ఇది నిజం. మూగజీవిని ఇంటర్వ్యూ చేయాల్సిన అవసరం ఎందుకు వచ్చిందో తెలుసుకోవాలంటే ఈ కథనం చదవాల్సిందే. 

ఆ వివరాలలోకి వెళితే.. పాకిస్థాన్‌‌లోని లాహోర్‌‌లో విపరీతంగా ట్రాఫిక్ సమస్య ఉంటుంది. అయితే ఆ సమస్య నుండి తప్పించుకోవడానికి ఓ ఫుట్‌ ఓవర్ బ్రిడ్జిని అధికారులు నిర్మించారు. అయితే.. మనుషులు మాత్రమే కాకుండా, దున్నపోతులు కూడా ఆ ఫుట్‌ ఓవర్ బ్రిడ్జి పై నుండే నడవాలని అధికారులు కొత్త రూల్‌ని ప్రవేశపెట్టారు. దీనితో ఆ మూగజీవాలు ఈ బ్రిడ్జి ఎక్కి దిగలేక నానా ఇబ్బందులు పడుతున్నాయి. 

లాహోర్‌లో  బ్రిడ్జిపై సాధారణంగా జనాలే నడుస్తుంటారు. కానీ ఇప్పుడు వెరైటీగా దున్నపోతులు కూడా నడుస్తున్నాయి. పాపం ఆ మూగజీవాలు అంత ఎత్తున్న బ్రిడ్జి ఎక్కి దిగలేక నానా అవస్థలు పడుతుండడంతో ఈ సంఘటనను టెలికాస్ట్ చేయడానికి పాక్‌కు చెందిన ఓ ప్రముఖ టీవీఛానల్ రిపోర్టర్ అక్కడికి వెళ్లాడు. ఇక్కడే అసలు ట్విస్ట్ మొదలైంది. ఆయన ప్రశ్నలు అడగడమేమోగాని ఆ దున్నపోతులు సమాధానం చెప్పడం కూడా విశేషం. 

ఇలా బ్రిడ్జి ఎక్కి పైనుంచి రోడ్డు దాటడం మీకెలా ఉంది... దీనిపై మీ అభిప్రాయమేమిటీ... అని ఓ దున్నపోతు దగ్గర మైక్ పెట్టి అడిగాడు. దీనికి ఆ దున్నపోతు 'అంబా' అని అరిచింది. దీనితో ఆ దున్నపోతు చెప్పడానికి కూడా బాధపడుతున్నట్లు ఆ రిపోర్టర్ చెప్పాడు. పశువులు మాట్లాడలేవని తెలిసి కూడా తన అతివినయంతో ప్రవర్తించిన జర్నలిస్ట్ పేరు అమిన్ హఫీజ్.