కువైట్‌లో ఉద్యోగం.. గదిలో నిర్భంధం.. ఆంధ్రా మహిళా వీడియో విజ్ఞప్తి

Andhra Woman

కువైట్‌లో ఉద్యోగాల కోసం వెళ్తున్న వారికి కొన్ని చోట్ల కలిసివచ్చినా.. మరికొన్ని చోట్ల వారికి ఇక్కట్లు తప్పలేదు. మొన్నటికి మొన్న ఏపీకి చెందిన ఓ వ్యక్తి దుబాయ్‌లో ఒంటెల కాపరిగా ఇక్కట్లు పడుతున్నానంటూ వీడియో రిలీజ్ చేశాడు. 

ఈ వీడియో ఆధారంగా ఏపీ సర్కారు అతనిని కాపాడి స్వదేశానికి తెచ్చింది. తాజాగా ఓ మహిళ కువైట్‌లో తాను చిత్రహింసలకు గురవుతున్న వీడియోను షేర్ చేసింది. య‌జ‌మాని త‌న‌ను బంధించి శారీరక, మానసిక వేధింపులకు గురి చేస్తున్నాడంటూ బాధితురాలు ఓ వీడియో ద్వారా త‌న గోడును వెళ్ల‌బోసింది. 

అన్నమయ్య జిల్లాకు చెందిన కవిత అనే మ‌హిళ‌ తనను చిత్రహింసల నుండి రక్షించాలని కోరుతూ ఏపీ మంత్రి రామ్ ప్రసాద్ రెడ్డికి వీడియోలో విజ్ఞప్తి చేసింది. ఇద్దరు పిల్లలు, వికలాంగుడైన భర్త కోసం తాను కువైట్ వెళ్లానని.. కానీ ఇక్కడ అన్యాయం జరుగుతుందని చెప్పింది. 

ఏజెంట్ ద్వారా ఇక్కడికి వచ్చానని.. పాస్ పోర్ట్ లాక్కుని, ఫోన్ బ్లాక్ చేశారని వాపోయింది. క‌విత‌ యజమాని ఆఫీస్‌లో గృహనిర్బంధంలో ఉన్న‌ట్లు తెలుస్తోంది. ఆమె విజ్ఞప్తికి స్పందించిన మంత్రి రామ్ ప్రసాద్ రెడ్డి వెంట‌నే రాష్ట్ర ఎన్నారై సాధికారత-సంబంధాల శాఖ మంత్రి కొండపల్లి శ్రీనివాస్‌కు లేఖ రాశారు. కవితను సురక్షితంగా స్వ‌దేశానికి తిరిగి వచ్చేలా జోక్యం చేసుకోవాలని కోరారు.