మలేషియా భద్రతా దళాలు అదుపులో 60 మంది భారతీయులు వున్నట్లు ఆలస్యంగా వెలుగులోకి వచ్చింది. ఇందులో ఓ భారతీయుడు కొవిడ్-19 లక్షణాలతో మరణించిన ఘటనపై స్పందించిన ఆ దేశ మానవ హక్కుల కమిషన్.. విచారణ చేపట్టింది.
తమిళనాడు, కేరళ, తెలంగాణకు చెందిన చాలా మంది.. హాలిడేస్ ఎంజాయ్ చేయడానికి ఈ ఏడాది మార్చిలో కౌలాలంపూర్ వెళ్లారు. వీరంతా మార్చి రెండోవారం నాటికి తిరిగి ఇండియాకు వచ్చేందుకు ఏర్పాట్లు చేసుకున్నారు.
అయితే కరోనా విజృంభించడంతో మలేషియా ప్రభుత్వం మార్చి 18 నుంచి దేశ వ్యాప్తంగా లాక్‌డౌన్ విధించింది. ఈ నేపథ్యంలో హాలిడేస్ ఎంజాయ్ చేయడం కోసం వెళ్లిన సుమారు 60 మంది భారతీయులు మలేషియాలో చిక్కుకున్నారు.
ఇదే సమయంలో అక్రమ వలసదారులపై ఉక్కుపాదం వేసిన మలేషియా ప్రభుత్వం..వారిని అదుపులోకి తీసుకోవడానికి భద్రతా దళాలకు ఆదేశాలు జారీ చేసింది.
ఈ నేపథ్యంలో కరోనా కారణంగా అక్కడే చిక్కుకున్న 60 మంది భారతీయులను కూడా అక్కడి భద్రతా దళాలు మే 1న అదుపులోకి తీసుకున్నాయి.
ఈ క్రమంలో భద్రతా దళాల అదుపులో ఉన్న చెన్నైకి చెందిన 67ఏళ్ల జీవ్‌దీన్ ఖాదర్ మస్తాన్ కొవిడ్ లక్షణాలతో మరణించారు. మలేషియా భద్రతా దళాలు అదుపులోకి తీసుకున్న 60 మంది భారతీయుల్లో 20 మంది మహిళలు ఉన్నారు.