భారత సంతతికి చెందిన రాజీవ్ షాను అమెరికా అంతర్జాతీయ అభివృద్ధి సంస్థ (యూఎస్ఏఐడీ) అధిపతిగా నియమిస్తూ అమెరికన్ సెనేట్ ఆమోదముద్ర వేసింది.
రాజీవ్ షా(36) ఒబామా పాలనాయంత్రాంగంలో అత్యున్నత పదవిని అధిరోహించిన భారతీయునిగా ఈ ఘనతను సాధించారు. క్రిస్మస్ పండుగ సెలవులకు ముందుగా ఈ బిల్లుపై సెనేట్ ఆమోద ముద్ర వేసింది. ఈ పదవికి దాదాపు 30కిపైగా నామినేషన్లు రాగా రాజీవ్ షాకే ఈ పదవి దక్కింది.
ప్రస్తుతం ఒబామా అనుసరిస్తున్న విదేశీ విధానంలో ఈ విధులు నిర్వహించే షా తన నివేదికలను ఎప్పటికప్పుడు అమెరికా విదేశాంగ కార్యదర్శి హిల్లరీ క్లింటన్‌ను నివేదిస్తుంటారు. దీంతోపాటు ఆయన వ్యవసాయ పరిశోధన సంస్థ, ఆర్థిక పరిశోధన సంస్థ తదితరాలను పర్యవేక్షిస్తారని సెనేట్ ఆమోద ముద్ర వేసినట్లు సెనేట్ వర్గాలు తెలిపాయి.