మిగిలే ఉన్న హెచ్1బీ వీసాలు

ఖండాలు, సముద్రాలు దాటి అమెరికాలో వెళ్ళి చదువుకోవాలన్నా, ఉద్యోగం చేయాలన్నా భారతీయులకు ఎంతో ఇష్టం. మన భారతీయులు తీవ్రంగా పోటీపడే అమెరికా వీసాల్లో ఈసారి బోలెడు ఖాళీలున్నాయి. హెచ్1బీ వీసాల్లో ఇంకా 20 వేలు మిగిలే ఉన్నాయని అధికార వర్గాలు తెలిపాయి.

కొత్త ఆర్థిక సంవత్సరం ప్రారంభం కాబోతుండగా ఇన్నేసి ఖాళీలు ఉండటం ఇదే తొలిసారి. ఆగస్టు 7 నాటికి హెచ్1బీ వీసాల కోసం 49 వేల దరఖాస్తులు మాత్రమే వచ్చాయని అమెరికా పౌరసత్వ, వలస సర్వీసుల విభాగం అధికారులు పేర్కొన్నారు.

2010 ఆర్థిక సంవత్సరానికి వీసాల జారీ కోసం ఈ ఏడాది ఏప్రిల్ 1 నుంచే దరఖాస్తుల స్వీకరణ మొదలుపెట్టారు. తొలి అయిదురోజుల్లో 42 వేల దరఖాస్తులు రాగా, ఆ తర్వాత నెలన్నర కాలంలో కేవలం 7 వేలే వచ్చాయి. నాలుగు నెలలుగా దరఖాస్తులు స్వీకరిస్తున్నా, ఖాళీలు అలాగే మిగిలిపోయాయి.

ప్రస్తుతం ఆర్థిక వ్యవస్థ మందగమనం, నిబంధనల్ని ఖచ్చితంగా అమలు చేయడం, పెద్దమొత్తంలో దరఖాస్తుల్ని తిరస్కరించటం కూడా ఈ పరిస్థితి తలెత్తటానికి కారణమని అధికారులు తెలిపారు.