పాకిస్థాన్ అణ్వాయుధాలను సీజ్ చేసే ఉద్దేశం అమెరికాకు ఎంతమాత్రం లేదని అగ్రదేశం తేల్చి చెప్పింది. పాకిస్థాన్‌లో ఉన్న అణ్వాయుధాలు చేజారి పోకుండా గట్టిభద్రతను పాక్ ప్రభుత్వం కల్పిస్తుందనే నమ్మకం ఉంది స్టేట్ డిపార్ట్‌మెంట్ స్పోక్స్‌మెన్ ఇయాన్ కెల్లీ అభిప్రాయపడ్డారు.
దీనిపై ఆయన మంగళవారం వాషింగ్టన్‌లో మాట్లాడుతూ.. పాక్ అణ్వాయుధాలు లేదా అణ్వాయుధాల తయారీలో ఉపయోగించే ఇతర విడి భాగాలు, పరికరాలను సీజ్ ఉద్దేశం తమకు లేదని స్పష్టం చేస్తున్నామన్నారు. అణ్వాయుధాలకు పాక్ ప్రభుత్వమే గట్టి భద్రతను కల్పిస్తుందనే నమ్మకాన్ని ఆయన వ్యక్తం చేశారు.
పాక్-ఆఫ్గన్ సరిహద్దుల్లో ఉగ్రవాదంపై అమెరికా చేస్తున్న పోరులో పాకిస్థాన్ కీలక భాగస్వామి అని ఆయన గుర్తు చేశారు. ఈ రెండు దేశాలు ఎంతో కలిసి పని చేస్తున్నాయి. అంతర్గత భద్రత అంశంపై చేపట్టిన పలు చర్యల్లో పాక్ పాలు పంచుకుందన్నారు.
తీవ్రవాదులకు అడ్డాగా మారిన పాకిస్థాన్‌లో అణ్వాయుధాలు ఉగ్రవాదులు కైవసం చేసుకునే అవకాశాలు ఉన్నట్టు వార్తలు వస్తున్న విషయం తెల్సిందే. దీనిపై ఇయాన్ కెల్లీ పై విధంగా స్పందించారు.